Siglir tar il cuntegn

Header

audio
Festa da chant ceciliana sursilvana 1996
Or da Artg musical dals 31.10.2021. Maletg: RTR, Hugo Schär
laschar ir. Durada: 58 minutas 22 Secundas.
cuntegn

Artg musical – chant religius Psalms e chanzuns religiusas

A la sava dal mais november cun ils firads da Numnasontga e Di da las olmas è in bun mument per reflectar e sa regurdar. Fitg bain va quai er cun tadlar chanzuns religiusas e psalms. E quai faschain en questas duas uras Artg musical.

En l'emprima ura da l'emissiun manain il temp enavos per in quart tschientaner. Ils 19 da matg 1996 èn 17 chors da la Surselva sa participads a la sisavla festa da chant ceciliana a Rueun. Avant la giuria cun Alvin Muoth e Mario Schwarz han els chantà cun plaschair ed engaschi lur chanzuns religiusas. Quasi in terz dals chors ch'èn lura sa preschentads en baselgia parochiala s. Andriu a Rueun na datti oz betg pli. Igl è pia er intginas regurdientschas e reminescenzas colliadas cun questas registraziuns.

Chors baselgia

La pandemia da corona ha er paralisà e bloccà la vita culturala en noss vitgs. Ils chors n'han per exempel betg pli dastgà far emprovas u producziuns publicas. Quai è ina greva frida per las uniuns. A chaschun da la radunanza generala da l'Uniun ceciliana Surselva l'entschatta october ha il president Albert Spescha er constatà ch'i regia ina tscherta tema per l'avegnir dals chors en general ed en spezial tar ils chors baselgia.

audio
Intervista cun Albert Spescha
ord Artg musical dals 25.10.2021. Maletg: MAD
laschar ir. Durada: 7 minutas 31 Secundas.

Psalteri genevrin

Il 16avel tschientaner ha il psalteri genevrin infectà l'entira Europa refurmada ed era la Svizra cun ina vaira fevra da psalms. Promovida entras il refurmatur da Genevra, Jean Calvin, è cumparida l'onn 1562 l'emprima collecziun cumpletta da tut ils psalms, mess en rima, translatads per franzos e cun melodias da divers cantors da Genevra. Questa ediziun ha distatgà ina gronda popularitad e bainprest èn cumparidas versiuns en autras linguas, er en rumantsch.

Psalteri genevrin

Avrir la box Serrar la box

Uschia vegn numnà ina retscha da cudeschs da chant refurmads temprivs cun texts da psalms mess en rima ed en lingua franzosa. Magari vegn il psalteri genevrin (Genfer Psalter) er numnà psalteri dals ughenots.

Gl’onn 1661 ha il giurist Lurainz Wietzel translatà psalms en puter. Ed uschia ha il chor baselgia da Zuoz chantà gia l’entschatta dal 18avel tschientaner quests psalms rumantschs, transcrits en motettas dal cumponist ollandais Jan Pieterszoon Sweelinck. Ils cudeschs da notas da quests psalms èn da chattar en l'archiv communal da Zuoz. Era en la biblioteca da la Chesa Planta hai divers manuscrets. Quels cudeschs cuntegnan tut ils 150 psalms che Jan Pieterzoon Sweelinck ha mess en musica.

audio
Psalteri genevrin ed auters psalms
ord Artg musical dals 31.10.2021. Maletg: MAD
laschar ir. Durada: 58 minutas 4 Secundas.

En l'emissiun èn d'udir diversas mottetas rumantschas chantadas da l'Ensemble Lamaraviglia. Quel ha edì questa stad in disc cumpact cun psalms e motettas en las quatter linguas naziunalas. In schatg pudais tadlar en la segunda ura Artg musical.

Ensemble lamaraviglia

Avrir la box Serrar la box

L'onn 2010 ha la mezzosopranista Stephanie Boller fundà l'ensemble vocal, là ha ella mess grond pais sin raffinezza linguistica, dimensiuns emoziunalas ed in tun omogen da l'ensemble. Quel sa cumpona da chantaduras e chantadurs da tut il mund, tuts èn spezialistas e spezialists en lur rom. Els chantan en tuttas quatter linguas naziunalas svizras, er en rumantsch.

En l'archiv da RTR sa chattan dentant er autras registraziuns da psalms, tranter auter il psalm 126 che l'ensemble da chant InCantanti preschenta u er il psalm 91 en ina versiun da Giacomo Meyerbeer.

Artg musical 14:00

Artitgels legids il pli savens