Siglir tar il cuntegn

Header

cuntegn

Artg musical Degustar la musica da festivals

En quest'emissiun tadlain nus viaden en dus festivals da musica da questa stad. «Klosters Music», in festival a Claustra cun musica classica ed «Alpentöne» in festival ad Altdorf cun diversas formaziuns e musica magari in pau pli moderna.

Alpentöne

Dapi il 1999 datti mintga dus onns il festival en il chantun Uri. Uschia hai er dà quest onn in tal festival dals tuns magari in zic specials. La filosofia dal festival «Alpentöne» è d'envidar musicistas e musicists ord tuts pajais da las Alps, da la Slovenia fin l'Oczitania (part da la Frantscha, gist sper Andorra) che han plaschair da las tradiziuns musicalas e che han er gust da «metter sin il chau» in zic questas tradiziuns. En in'emprim Artg musical preschentain a vus la «Ländlersinfonie» da Thomas Aeschbacher. Cun il Ländlerorchester ha el preschentà la voluminusa ovra «Jahreszyte im Ämmitau» nua ch'el cumbinescha diversas chanzuns e melodias dal Emmental.

Er la Bandella Vista Mare è ina furmaziun ch'è sa preschentada ad Altdorf. Cun lur stil modern da la musica populara tessinaisa han els divertì e persvadì il publicum.  

audio
Alpentöne - Ländlersinfonie
ord Artg musical dals 12.09.2021. Maletg: mad
laschar ir. Durada: 58 minutas 49 Secundas.

Klosters Music

Per la terza giada è stà l'avust da quest onn il festival Klosters Music. Diversas furmaziuns èn sa deditgadas a la musica da la Boemia dal 18avel e 19avel tschientaner. L'entschatta avust hai dà il concert «Zeitlose Pracht» nua che l'orchester La Scintilla ha sunà ovras dal temp baroc. Sut la direcziun da la violonista Anna Gebert ha l'orchester oriund da Turitg (part da l'Orchester da la Chasa d'opera) dentant er accumpagnà las arias chantadas da Julie Fuchs. La Franzosa giauda gronda stima ed è adina puspè preschenta sin las tribunas internaziunalas. 

In ulteriura part da l'emissiun Artg musical lascha resunar l'orgla. L'organist svizzer Rudolf Lutz ha sunà sin l'orgla da la baselgia Son Giachen a Claustra diversas ovras da la musica classica. Lutz è dentant er enconuschent per sias improvisaziuns, er ina da quellas ha chattà ses plaz en l'emissiun.

audio
Klosters Music - Musica d'orchester e d'orgla
ord Artg musical dals 12.09.2021. Maletg: Marcel Giger
laschar ir. Durada: 59 minutas 7 Secundas.

RTR Artg musical 14:00 e 15:00

Artitgels legids il pli savens