Siglir tar il cuntegn

Header

audio
Giubileums
Or da Artg musical dals 24.10.2021.
laschar ir. Durada: 58:53 minutas.
cuntegn

Artg musical Giubileums

Il 2020 ed il 2021 pon insaquantas societads da musica grischunas festivar in giubileum da 125 u da 100 onns. En l'Artg musical tadlain registraziuns ord noss archiv da tut questas musicas instrumentalas.

125 onns Brass Band Cazis – il giubileum

Il 1896 è vegnida fundada la Societad da musica Cazis. Durant quests 125 onns è la societad sa transfurmada da la societad da musica ad ina Brass Band. En l'Instrumentala dals 13 d'october 21 avain tedlà intgins tocs da lur concert da giubileum ch'è stà ils 2 d'october en la halla plurivalenta a Cazis. RTR ha registrà l'entir concert. En l'Artg musical vulain dar in sguard en l'istorgia da la musica, laschar resunar registraziuns pli veglias ed er anc intginas producziuns da lur concert da giubileum.

audio
125 onns Brass Band Cazis – il giubileum
58:38 min, Artg musical dals 24.10.2021.
laschar ir. Durada: 58:38 minutas.

Er a pled vegn Hardy Pirovino, il president actual da la BB Cazis. Giusut chattais vus l'entira intervista che jau hai pudì far cun el avant il concert da sonda ils 2 d'october 2021. Hardy Pirovino è in'ulteriur commember da la famiglia Pirovino ch'è dapi la fundaziun da la musica activa – ina vaira dinastia. L'urat Gebhard Pirovino è stà confundatur ed il bab da Hardy, Beat è stà passa 50 onns commember activ, 26 onns sco president. Actualmain sunan sper Hardy (eufoni) era sia soras Anja (trumba) e Liana (solo-cornet) en la BB Cazis sco er sia dunna Sonja (corn en es).

audio
Intervista cun il president BB Cazis, Hardy Pirovino
03:43 min, Artg musical dals 24.10.2021.
laschar ir. Durada: 03:43 minutas.

La dirigenta oriunda da la BB Cazis, Susanne Rechsteiner, ha stuì dar forfait per il concert da giubileum muort maldispostadad. La musica ha dentant gì fortuna e chattà Duri Cathomen ch'è siglì en per il concert da giubileum.

audio
Intervista cun il dirigent da concert, Duri Cathomen
02:11 min, Artg musical dals 24.10.2021.
laschar ir. Durada: 02:11 minutas.

Tom Davoren – cumponist da «1896 – Unleashing the Force»

Avrir la box Serrar la box

Il giuven cumponist da l'annada 1986 ha studegià tuba tar Nigel Seaman al Royal Welsh College of Music&Drama. El è stà nominà il 2011 per il British Composer Award ed è vegnì undrà il 2012 a la concurrenza da cumposiziun europeic. Il 2014 ha el survegnì il Harvey Philips Award per sias cumposiziuns.

100 onns Musica da Trin

Era la Musica da Trin pudess festivar quest onn in grond giubileum: 100 onns. La musica da Trin na fa dentant nagina gronda festa cunquai ch'i dat actualmain be paucs commembers activs ed ils ultims onns èsi stà detg quiet. Intginas musicantas ed intgins musicants da Trin sunan ensemen cun la musica da Favugn che ha medemamain in zic pitgiras cun il dumber da commemberas e commembers activs. Ils megliers temps ha la Musica da Trin gì ils onns 90. Il 1995 ha ella dà ora in disc cumpact «Impressiuns en brass» cun il dirigent Urs Cadruvi. Dad ella udin registraziuns en la segunda ura Artg musical.

Giubileums gia l'onn 2020

audio
Giubileums
58:53 min, Artg musical dals 24.10.2021.
laschar ir. Durada: 58:53 minutas.

En il Partenz....

La musica da Grüsch ch'è vegnida fundada l'onn 1920 ha gia festivà ordavant ses grond giubileum da 100 onns. Ils 15 e 16 da november 2019 hai dà ina gronda festa a Grüsch en ina tenda da circus ensemen cun ulteriuras uniuns dal vitg. Cun il motto «Spärgamenter 288» ha la populaziun festivà 100 onns Musikgesellschaft Grüsch, 100 onns Uniun da gimnastica Grüsch, 60 onns uniun da gimnastica da las dunnas Grüsch e 28 onns uniun da gimnastica da las damas da Grüsch.

... ed er en Surselva

Gia l'onn passà han u meglier avessan pudì festivar lur giubileums las societads da musica da Sumvitg-Cumpadials (fundada l'onn 1895), Danis-Tavanasa (1920) e Vignogn (1920). Pervi da la pandemia han tuttas trais societads sursilvanas stuì desister da far festa. Vignogn ha planisà da prender suenter lur giubileum l'onn 2022 e Danis-Tavanasa fa ils 6 da november 2021 in concert da gala. Da tuttas trais musicas tadlain registraziuns che nus avain en noss archiv da musica. La pli veglia registraziun è ina da l'onn 1967 cun la musica da Sumvitg-Cumpadials.

Artg musical 14:00

Artitgels legids il pli savens

Scrollar a sanestra Scrollar a dretga