Siglir tar il cuntegn

Header

audio
L’ensemble vocal Origen en la tur dal Güglia
Or da Artg musical dals 12.12.2021. Maletg: Origen fesival cultural, Jasmin Schnellmann
laschar ir. Durada: 1 minuta.
cuntegn

Artg Musical L’ensemble vocal Origen en la tur dal Güglia

Ensemen cun l'ensemble vocal Origen preschenta RTR ina registraziun particulara. Tut aparti n'è betg be il program musical cun chanzuns artisticas dals cumponists Armon Cantieni, Benedetg Dolf, Gion Antoni Derungs, Meinrad Schütter e Paul Juon. Mabain era la registraziun dal video en furma da 360°.

Il video

«Ina giada as platgar sin il palc pendent entamez la tur dal Güglia» – quest giavisch po RTR ademplir a vus! Ensemen cun l’Ensemble vocal Origen avain nus realisà ina registraziun da video en furma da 360°. Grazia a questa tecnologia na stuais vus per ina giada betg prender plazza sin la sutga en las retschas d’aspectaturs. Questa giada essas vus entamez il palc tranter chor e dirigent. Durant ch’il chor chanta pudais vus muventar il maletg e contemplar la tur u admirar il magnific panorama ord las fanestras da la tur. Ni simplamain guardar tiers co i vegn chantà ubain studegiar ils moviments dal dirigent.

Era per il tun avain nus nizzegià per quest video ina da las pli novas tecnologias. Cun guardar il video sin il telefonin ensemen cun uregliers pudais vus profitar dal «tun spazial». Grazia a quel sa sentan era vossas ureglias sco entamez la tur dal Güglia. Il tun spazial è ina sort tun tridimensiunal che sa drizza a la vista actuala dal maletg.

audio
Discurs cun Flavio Tuor davart la producziun dal video da 360°
ord Actualitad dals 13.12.2021.
laschar ir. Durada: 4 minutas 56 Secundas.

La tur dal Güglia

La tur cotschna sin il Pass dal Güglia – segiramain che bleras e blers da vus enconuschan quella almain d'ordaifer. In edifizi marcant en ina cuntrada alpina, aspra ed imposanta – ed er in lieu per pertschaiver cultura, chant e musica.

Ils cumponists

Armon Cantieni

Avrir la box Serrar la box
Armon Cantieni
Legenda: Armon Cantieni MAD

In cumponist impurtant da noss chantun. El, figl da Robert Cantieni, ha vivì dal 1907 fin dal 1962 – ed ha cumponì ovras per orgel e clavazin e bleras chanzuns ch’èn daventadas popularas. Sias melodias enconuschentas: Mai, sün tschêl gnanc’üna nüvla – l’En, Adieu o Dumonda, matta voust tü esser mia.

Benedetg Dolf

Avrir la box Serrar la box
Benedetg Dolf
Legenda: Benedetg Dolf RTR

El è naschì ils 13 d'avust 1918 sco figl da Berta e Tumasch Dolf a Ziràn. El è sta in dals gronds umens da la musica indigena – cumponist da passa 1'500 ovras, magister da clavazin ed orgla al Seminari da scolasts a Cuira ed er teolog. El è mort ils 5 d'avust 1985.

Gion Antoni Derungs

Avrir la box Serrar la box
Gion Antoni Derungs
Legenda: Gion Antoni Derungs ANR

Gion Antoni Derungs – bain il pli grond ed impurtant cumponist rumantsch – è naschì ils 6 da settember dal 1935 a Vella ed è mort ils 4 da settember dal 2012 a Cuira. El ha fatg ses studis al conservatori a Turitg ed è vegnì promovi da ses aug, il cumponist Duri Sialm. Dapi il 1962 e fin il 1999 è el magister al seminari a Cuira, organist da la catedrala ed el ha fundà il 1971 il «Quartet Grischun» che preschentava surtut musica contemporana. Il 1986 cumpara sia opera rumantscha «Il cerchel magic». Da Gion Antoni Derungs datti sur 400 cumposiziuns.

Meinrad Schütter

Avrir la box Serrar la box
Meinrad Schütter
Legenda: Meinrad Schütter neo.mx3

Er d’udir en il program dal Ensemble Origen: chanzuns da Meinrad Schütter, naschì ils 21 da settember dal 1910 a Cuira – e mort ils 12 da schaner dal 2006 a Küsnacht. El ha lavura blers onns sco corepetitur da ballet e dirigent da l’illuminaziun en la chasa d’operas a Turitg. Sper quai ha el cumponì numerusas ovras instrumentalas e vocalas, dus messas, l’opera Medea, musica per ballet, cumposiziuns per orchester ed in concert da clavazin.

Paul Juon

Avrir la box Serrar la box

In cumponist da renum internaziunal cun ragischs grischunas – oriund da Masein. In sa vesair el sco fegl perdì. Ses tat Simon Juon era emigrà a Kuldiga en la Lettonia d'ozendi. Paul Juon è naschì 1872 a Moscau. Sias staziuns: vivì e studegià là musica, lavurà il bler da sia vita a Berlin, vegnì sco um pensiunà en Svizra e mort qua a Vevey, ils 21 d'avust 1940. Paul Juon – era numnà il Brahms russ – è senza dubi in dals gronds Grischuns en il sectur da la musica. Ses relasch dumbra 99 ovras cun numer dad opus: musica per clavazin e cameristica, concerts, ina sinfonia, musica da scena, ovras per orchester e chanzuns da solo.

Il concert

En l'Artg musical dad oz ans platgain nus pia entamez l'intern da la tur e laschain tunar ella. Vus udis il program «Ruinaulta» chantà dal Ensemble vocal Origen. 16 chantaduras e chantadurs sut la batgetta da Clau Scherrer cun chanzuns da cumponists indigens enconuschents: Armon Cantieni, Benedetg Dolf, Gion Antoni Derungs, Meinrad Schütter e Paul Juon.

RTR Artg musical 14:00

Artitgels legids il pli savens