Siglir tar il cuntegn

Header

cuntegn

Artg musical L'oratori da Pasca ed il Magnificat

Il temp da passiun che fa endament la suffrientscha da Jesus è a fin. La festa da Pasca è plain optimissem, ella regorda che Jesus è levà da la mort. Quai sa mussa er en la musica. Las ovras per il temp da passiun èn pensivas e tristas – quellas da Pasca plain speranza ed allegria.

Per la dumengia da Pasca datti in Artg musical cun ovras da bab e figl, e vus pudais allegrar sin l’oratori da Pasca e sin la messa en g-moll da Johann Sebastian Bach (emprima part) e sin il Magnificat per solistas, cor ed orchester da ses figl Carl Philipp Emanuel Bach (segunda part).

L'oratori da Pasca

audio
Johann Sebastian Bach: L'oratori da Pasca e la messa en g-moll
ord Artg musical dals 17.04.2022. Maletg: MAD
laschar ir. Durada: 57 minutas 22 Secundas.

L’oratori da Pasca da Johann Sebastian Bach è vegnì preschentà l’emprima giada il prim d’avrigl dal 1725, ina dumengia da Pasca. Pli tard datti lura anc trais autras versiuns, cun in pèr grondas differenzas en congual cun l’original. En questas na datti betg pli persunas biblicas che raquintan l’istorgia da la suffrientscha da Jesus, la furma è pli neutrala.

In orchester
Legenda: I Barrochisti La registraziun dals 6 d’avrigl 2012 en la Chiesa San Nicolao a Lugano è ina producziun da Rete due, dal radio da la Svizra taliana. Vus udis: I Barocchisti, il Coro della Radiotelevisione Svizzera, dirigent è Diego Fasolis. MAD

Magnificat

Carl Philipp Emanuel Bach stat en il center da la segunda ura da l'Artg musical. El è naschì ils 8 da mars 1714 a Weimar e mort ils 14 da december 1788 a Hamburg ed è il pli renumà ed enconuschent dals 6 figls da Johann Sebastian Bach.

audio
Carl Philipp Emanuel Bach: Magnificat
ord Artg musical dals 17.04.2022. Maletg: RTR
laschar ir. Durada: 58 minutas 30 Secundas.

Il 1749 ha el cumponì ses Magnificat per soli, cor ed orchester – e quel udis en ina registraziun dal 2014 cun il Rundfunkchor Berlin, l’orchester da chombra «Carl Philipp Emanuel Bach» e ses dirigent Hartmut Haenchen. Questa furmaziun cun 25 musicistas e musicists dals gronds orchesters da Berlin è vegnida fundada il 1969 ed è sa spezialisada sin il repertori da la classica tempriva e surtut sin las cumposiziuns da Carl Philipp Emanuel Bach. L’orchester ha existì fin il 2014 ed ha participà a blers festivalsimpurtants ed ha registrà passa 60 portatuns.

RTR Artg musical 14:00

Artitgels legids il pli savens