La «Stubete am See» è in eveniment ch'è mintg’onn la fin d’avust a Turitg. Per amaturas ed amaturs da la musica populara è quai in dals inscunters impurtants. Dapi l’onn passà datti er en Engiadina ina «Stubete am See», in'occurrenza a Segl cun las medemas finamiras: preschentar furmaziuns e lur musica populara, cun tuns tradiziunals ed innovativs fin tar tuns surprendents ed improvisaziun. Il program da quests trais dis: divers concerts sin palcs en hotels e quatter represchentaziuns en la chasa da scola Champsegl. Questas avain nus registrà per preschentar en l’Artg musical. Oz udis ils concerts dal duo TOPF e da la chapella Nogler.
La chapella Nogler: ina registraziun exclusiva cun sauts tradiziunals
Quest quartet è vegni furmà sin basa dad ina fotografia veglia dal 1913, in purtret da la chapella da Johannes Nogler d’Ardez cun cuntrabass, dus gìas ed ina clarinetta pitschna. Lur sauts vegls chattads en in cudeschet cun notas èn in vair stgazi da la musica populara engiadinaisa – e quels vegnan uss interpretads en ina nova furma da Peter Kosak, cuntrabass – Clarigna Küng e Johannes Gürth, violina – Florian Walser, clarinetta.
TOPF, l’arpet en tut sias fassettas, elements tradiziunals e bler gust d’experimentar
Töbi Tobler e Christoph Pfändler èn duos virtuos al arpet, quel instrument ch’ins auda surtut en la musica Appenzellaisa. Lur musica è innovativa, experimentala e surpassa tut ils cunfins. Cumenzà ha tut avant blers onns cur che Töbi Tobler é sta il magister da Christoph Pfändler, uss fan els ensemen musica ed èn enconuschents tar in vast public.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.