Siglir tar il cuntegn

Header

audio
La musica instrumentala viva
Or da Artg musical dals 05.12.2021. Maletg: SRF
laschar ir. Durada: 1 minuta 58 Secundas.
cuntegn

Artg musical RTR sin visita tar SRF Musikwelle

En l'Artg musical datti oz ina festa da musica instrumentala da duas uras. En in’emissiun communabla ensemen cun la SRF Musikwelle vegnin perditga che la scena da la musica instrumentala viva vinavant era sche la pandemia ha chaschunà bia pensiers.

I dat da tadlar musica instrumentala ord diversas spartas e vus emprendais d’enconuscher giuvens talents. Mes collega da moderaziun da la SRF Musikwelle, Roman Portmann, ha era visità duas societads da musica directamain en lur local d’emprova, cunquai che las mesiras da corona n'han betg lubì ad ellas da vegnir en il studio a Turitg. En l'emissiun preschentain nus las tschintg furmaziuns e faschain er intervistas.

Envidada a l'emissiun è er stada Luana Menoud-Baldi, la presidenta da l'Uniun svizra da musica. Cun ella avain nus pudì discurrer davart las consequenzas da la pandemia sin las societads da musica e tge che l'USM po far per sustegnair la scena da musica instrumentala svizra.

Las furmaziuns

Per l'emissiun communabla ha Roman Portmann envidà diversas furmaziuns. RTR ha pudì vegnir cun ina furmaziun ospitanta ed ha envidà il quartet da trumbettas da l'Engiadin'Auta, MOTRE. La giuvna ed ils giuvens han inchantà las autras furmaziuns.

MOTRE

Avrir la box Serrar la box
Legenda: Da san. Simon e Gian Duri Gabriel, Flavia Castillo, Janic Sendlhofer SRF

munta Musikschule Oberengadin Trompeten Ensemble. Quel exista dapi il 2016. Al cumenzament eran quai ils fargliuns Simon e Gian Duri Gabriel ed ils fargliuns Janic e Noa Sendlhofer. Dapi quest avust remplazza Flavia Castillo il Noa Sendlhofer. Anton Ludwig Wilhalm è manader musical.

Rex Quintett

Avrir la box Serrar la box
Legenda: Da san.: Philipp Färber, Benjamin Frei, Anton Fetz, René Lei ed Andrin Lüchinger MAD

Il quintet da la Svizra orientala suna melodias ord differentas spartas, dovran sco fundament dentant adina il stil da Oberkrain.

Capella Walter Grimm

Avrir la box Serrar la box
Legenda: Da san.: Oski Della Torre, Martin Suter, Walter Grimm, Urs Krienbühl MAD

Walter Grimm ha in'atgna fatschenta da musica ed ha da far bler cun musica instrumentala. Sia furmaziun suna però il stil da musica populara. Grimm sez suna savens clarinetta dentant er il sopran-saxofon.

Musica Frohsinn Oberburg

Avrir la box Serrar la box
Legenda: La societad da musica Frohsinn Oberburg. MAD

La societad da musica suna en furmaziun da Brass Band e sa participescha regularmain er a concurrenzas e festas da musica. Dirigent è Jan Müller.

Spielgemeinschaft Hohentengen-Kaiserstuhl

Avrir la box Serrar la box
Legenda: La cuminanza da sunar Hohentengen-Kaiserstuhl. MAD, Katrin Walter

La societad da musica suna en furmaziun da musica d'armonia. Il spezial vid ella è ch'ella è in'uniun sur cunfin. La musica è fusiunada tranter la societad da musica Hohentengen (Germania) e quella da Kaiserstuhl (AG). Dirigent è Manuel Wagner.

Artg musical 14:00

Artitgels legids il pli savens