L'oratori da Nadal da Johann Sebastian Bach tutga tar ses oratoris ils pli populars ed è ina da sias cumposiziuns spiritualas las pli enconuschentas. L'ovra cumpiglia sis cantatas che tematiseschan ils dis tranter Nadal e Buania (Festa dals Trais sontgs retgs), ella raquinta pia l'istorgia davent la naschientscha da Jesus Cristus, sur l'annunzia entras ils anghels, la visita dals pasturs fin il di ch'ils trais sontgs retgs (Casper, Meltger e Baltasar) visitan il Bambin en la stalla a Bethlehem.
L'oratori n'è betg ina cumposiziun cumplessiva ed entira. Ella sa cumpona da trais cantatas che Bach aveva scrit per ils dis da festa Nadal, Bumaun e Buania. Per ses oratori ha el prendì vitiers cantatas cumponidas gia pli baud e per part midà il text, uschenumnadas «parodias». In exempel per ina tala parodia è gist l’avertura «Jauchzet, frohlocket» (emprima chanzun da l'emprima cantata). Quella ha Bach prendì ord ina cantata da gratulaziun per la princessa saxona. Il text d’origin: «Tönet, ihr Pauken, erschallet Trompeten».
En l'oratori dovra Bach diversas furmas musicalas: chant da chor (chorals), recitativs cun ils texts biblics che cumprovan l'istorgia da Nadal, arias e parts per orchester. La primaudiziun ha gì lieu a sis servetschs divins tranter Nadal (25 da december 1734) ed il di da Buania (6 da schaner 1735).
Las parts I, II, IV e VI èn vegnidas preschentadas duas giadas a di, l'avant- ed il suentermezdi, en las baselgias sontg Thomas e sontg Nicolai a Leipzig. Las parts III e V han ins preschentà sulet en la baselgia da sontg Nicolai. Ulteriuras preschentaziuns durant la vita da Bach n'èn betg documentadas, n'èn però betg nunprobablas.
En l'emissiun speziala per Nadal pudain nus tadlar las parts I, II, III, IV e per part anc la part IV. L'entira ovra cuzzass radund duas uras e mesa.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.