L'emissiun «Profil» datti gia dapi l'onn 1984. L'emprim osp è sta Tista Murk. Mia carriera da far Profils ha cumenzà il 2008, dapi lura èn quai stads var 80 Profils che jau hai dastgà far.
Blers e bleras avevan plitost tema da far questa emissiun. Savens vegniva la dumonda da tge che vulain pomai discurrer in'entira ura. A la fin era in'ura per pli memia curt.
Far Profils cun dunnas – quai ha plaschì a mai il meglier. Igl è magari stà pli stentus da persvader ina dunna da far in Profil. Ellas èn magari pli scepticas e pli criticas, saja quai da far ina fotografia che tutga tar il Profil u era en il discurs sez. A mai plascha simplamain cura che differentas vuschs s’inscuntran um e dunna, bass e sopran, tenor ed alt, quai è sco musica per mias ureglias.
Sper ils blers discurs cun dunnas hai jau fatg 12 Profils cun pèrs. Il pli savens cun um e dunna, dentant era bab e figlia u duas soras èn stadas avant il microfon. Ed en in Profil èn gist dus Giusep Fry sa participads.
La finala hai dà numerus Profils cun umens. Per organisar e realisar eran quai mintgamai ils pli simpels Profils. In telefon, in discurs – ed ach gea – «sas anc star nà per ina foto?», in clic e bun èsi.
Ord vista da mias lavurs tar RTR sco correspundent e suenter producent da la Surselva - Grischun Central, èn ils Profils stads la lavur che jau hai fatg il pli gugent.