Siglir tar il cuntegn

Header

Fotografia da la biblioteca municipala da Birxen/Berssenone
Legenda: MAD
cuntegn

Brixen/Persenon Festival da la lirica alpina

A Brixen/Persenon en il Tirol dal Sid sa scuntran ils 12 e 13 da matg 2023 auturas ed auturs da las trais regiuns retorumantschas. Poetessas e poets ladin-dolomitans, furlans e rumantschs prelegian e discutan en occasiun dal «Festival da la poesia alpina contemporana».

audio
Festival da lirica alpina
ord Actualitad dals 13.05.2023. Maletg: Freiundzeit
laschar ir. Durada: 9 minutas 21 Secundas.

15 auturas ed auturs che scrivan en ladin dolomitan, furlan e rumantsch prelegian lur texts en la Biblioteca municipala da Brixen/Persenon (Italia). Lur poesias vegnan preschentadas e commentadas da trais critichers e scienziads da litteratura da mintga regiun linguistica, dad Annetta Ganzoni, Gabriele Zanello e Rut Bernardi.

Da la partida al festival da la poesia èn era chantauturas e chantauturs da las trais regiuns linguisticas: Astrid Alexandre per il Grischun rumantsch, il chantautur Luigi Maieron dal Friul ed Antia Obwegs oriunda da la Val Gherdëina.

In inscunter per sa barattar e cumparegliar

Il Grischun rumantsch è preschent cun tschintg auturas ed auturs: Dumenic Andry, Flurina Badel, Carin Caduff, Chatrina Josty e Claudio Spescha. Els vegnan a preleger il venderdi u la sonda lur poesias en ils differents idioms rumantschs. Da la regiun ladina dolomitana èn sin il palc a Brixen: Nadia Rungger, Rafael Prugger, Claus Soraperra, Cristina De Grandi e Roberta Dapunt. Las auturas ed auturs furlans èn: Gianluca Franco, Antonella Sbuelz, Francesco Indrigo, Nelvia Di Monte, Luigina Lorenzini.

L’idea dal «Festival da la poesia contemporana alpina» è – sco ch’ils organisaturs scrivan en ina communicaziun a las medias – da porscher ina «occasiun d’inscunter e da cumparaziun preziusa» tranter las litteraturas da las trais regiuns linguisticas e dad approfundar uschia «l’enconuschientscha da la realitad linguistic-litterara da questas trais inslas linguisticas alpinas». 

Organisà vegn l’inscunter da differentas instituziuns dals trais «pajais retorumantschs» – uschia da l’Uniun da scripturas e scripturs dal Tirol dal sid (SAAV), il Center europeic da Litteratura e Traducziun (ZeLT), la Partiziun per furmaziun e cultura ladina da la Provinza da Bulsaun, il chantun Grischun, la Fundaziun svizra per la cultura Pro Helvetia, il Consulat svizzer da Milaun, l’ARLeF (Agjenzie Regjonâl pe lenghe furlane) e la Biblioteca municipala da Persenon.

Tgi che n'ha betg la pussaivladad dad esser il venderdi e sonda a Brixen po seguir las occurrenzas er via in livestream.

RTR Ura culturala 11:03

Artitgels legids il pli savens

Scrollar a sanestra Scrollar a dretga