In'instituziun che n'è mai stada a cor
Ina cifra-clav che crescha dapi onns cuntinuadamain en il Grischun, gea en l'entira Svizra, è quella da las extradas da la Baselgia. Las cifras che l'Uffizi federal da statistica ha publitgà il schaner passà conferman questa tendenza. Tenor quellas è gia mintga terza persuna en Svizra, quai vul dir 34% da la populaziun, senza confessiun. Dominik Hardegger, schurnalist tar RTR, tutga facticamain gia daditg tar quella gruppa da persunas, pertge cun Baselgia na po el pigliar a mauns pauc fin nagut.
Jau chapesch che umans tschertgan tschertas respostas en la religiun. Jau na fatsch betg quai. A mai tanschan fatgs scientifics u l'emprova da chapir mes conumans.
Tuttina è el battegià e da pitschen ensi catolic. Ma pertge n'è el mai sortì da la Baselgia? Tge muntan cardientscha e Baselgia anc per el?
Persvadì d'extrar, ma...
Per ir a fund a talas dumondas è Dominik sa mess sin viadi. Il resultat è in film per il format Clic. En quel s’inscuntra el tranter auter cun ina represchentanta e cun in represchentant da la Baselgia: l'uvestg da Cuira Joseph Maria Bonnemain e la teologa Flurina Cavegn. Lur ideas e patratgs han animà Dominik da sa fatschentar anc ina giada cun sia relaziun cun la baselgia. I va per dumondas, en tge moda e maniera che la cretta catolica po anc commover ils umans e pertge ch'i fiss impurtant da restar precis ussa en la Baselgia, sch'ins ha l'intenziun d'extrar.
Jau hai gì inscunters ch'han dà da pensar a mai. Vi jau extrar e laschar enavos quai che jau na poss betg sustegnair u vi jau star per pudair midar insatge?
Da lur relaziun e da lur via cun Dieu e cun la Baselgia raquintan medemamain l’autura Viola Cadruvi da Turitg, l’um pensiunà Robert Derungs dad Uors e Flurin Monn che studegia a Turitg.
Tge experientschas che Dominik Hardegger ha fatg, co ch'ina pitschna panna ha impedì sia sortida da la Baselgia e sch’el è la fin finala sortì u sch’el è anc commember, raquinta el en Vita e cretta.
