Uschè svelt poi ir: L’enviern 2005/06 è vegnì inaugurà a Savognin dasper las pendicularas il Hotel Cube. Cun paucas e posaunas. Cun sustegn da politica e turissem. Cumbinà cun speranzas d’attrair giasts giuvens e sportivs. Il pli grond hotel da la val: in quadrel gigantic da vaider, betun e colurs, 16 milliuns investiziuns, 270 letgs e 30 plazzas da lavur. Però il quadrel na rodla mai propi endretg. Svelt datti dispitas, l’hotel na s’emplenescha betg, l’investider austriac Rudolf Tucek inculpescha las pendicularas. Quest atun alura l’escalaziun: Tucek serra ses Cube. Uschè svelt poi ir. Perfin si Savognin.
