Siglir tar il cuntegn

Header

Rezept für ein Weihnachtsmenu: Kartoffelsoufflé
Legenda: RTR
cuntegn

Chalender d'advent – porta 13 Soufflé da tartuffels

Il suflà da tartuffels è adattà sco garnitura per il salmun cun crusta da citrona ed ervas ubain per il brassà da galdin che nus preschentain ils 22-12-2022. Tge garnituras avais vus il pli gugent?

Rezept für ein Weihnachtsmenu: Kartoffelsoufflé
Legenda: Soufflé da tartuffels RTR

temp da preparaziun: ca. 20 minutas
temp da coier: 20-25 minutas
6-8 purziuns sco avantpast (furmettas cun in cuntegn da ca. 170 ml)

Ingredienzas

  • 600 g tartuffels farinus
  • 1 tschadun grond paintg per engrassar las furmettas
  • 25 g farina da panar per springir las furmettas
  • 75 g groma
  • 4 ovs
  • 130 g chaschiel grattà recent (p.ex. Gruyère)
  • sal, paiver e nusch-mustgat
  • 100 g schambun (tenor gust)
  • 20 g tschagugliuns

 

Preparaziun

  • Lavar, mundar e tagliar en quatter parts ils tartuffels.
  • Far buglir 1 liter aua, la salar e coier lien ils tartuffels fin ch'els èn loms (ca. 15 minutas).
  • Svidar giu l'aua. Smatgar bain ils tartuffels cun ina pressa ubain ina furtgetta.
  • Prestgaudar il furnel sin 200 grads cun temperatura da sura e da sut.
  • Engrassar cun paintg las furmettas e springir ellas cun farina da panar.
  • Separar il mellen da l'alv d'ov.
  • Tagliar fin ils tschagugliuns.
  • Tagliar en quadrins il schambun ed als maschadar bain cun il mellen d'ov, la groma, la mesadad dal chaschiel grattà e la buglia da tartuffels. Tgi che vul far pli fina la massa, la po svelt purar.
  • Cundir cun sal, paiver ed ina presa nusch-mustgat ed agiuntar ils tschagugliuns. Metter da la vart in pèr tschagugliuns per la decoraziun.
  • Sbatter l'alv d'ov, al maschadar precautamain cun la massa da tartuffels e l'emplenir en las furmettas fin pauc sut l'ur (ils soufflés van anc si in zic en furnel).
  • Springir ils soufflés cun l'ulteriur chaschiel e far coier els 20-25 minutas cun temperatura da sura e da sut.
  • Garnir ils soufflés da tartuffels cotgs cun ils tschagugliuns restants ed als servir.

Tip

Avrir la box Serrar la box

Ils soufflés pon ins preparar bain il di avant u la damaun. Sbatter l'alv d'ov pir curt avant che coier ils suflads ed al maschadar precautamain cun la massa da tartuffels. Servir immediat els, cunquai ch'i dattan in pau ensemen suenter paucas minutas. Per ina varianta vegetariana pon ins simplamain laschar davent il schambun.

Artitgels legids il pli savens

Scrollar a sanestra Scrollar a dretga