Siglir tar il cuntegn

Header

Rezept für Weihnachtssirup: Vanille-Orangen Sirup
Legenda: RTR
cuntegn

Chalender d'advent – porta 7 Sirup da vaniglia-oranscha | Vanille-Orangen Sirup

En stizun u butia datti durant quest temp da l'onn dapertut oranschas. Nus preschentain oz a vus in recept per in sirup d'oranschas per pitschen e grond.

ca. 1 liter sirup

temp da preparaziun: 15 minutas; temp da coier: 30 minutas

 Ingredienzas

  • 20 oranschas sucusas (ubain 1,5 liters suc d'oranschas)
  • 2 citronas
  • 400 g zutger
  • 2 scorsas-chanella
  • 2 neghels
  • 2 anis stailads
  • pulpa d'ina bagiauna da vaniglia

 

Preparaziun

  • Far permez las oranschas e citronas, las struclar a maun u cun agid d'ina pressa da sucs. Per noss sirup duvrain nus ca. 1,5 liters suc.
  • Svidar il suc tras in culin en ina gronda padella.
  • Agiuntar il zutger, la pulpa d'ina bagiauna da vaniglia e las ulteriuras spezarias. Laschar coier levamain la maschaida ca. 30 minutas fin che circa in terz dal liquid è svapurà. Truschar da temp en temp.
  • Sterilisar entant la(s) buttiglia(s) cun las metter ca. 10 minutas en il furnel stgaudà sin 150 grads ubain las coier curtamain en aua buglienta. P.pl. stgaudar parts da plastic sco p.ex. il viertgel mo en l'aua e betg en il furnel!
  • Emplenir il sirup buglient en la(s) buttiglia(s) chauda(s) e la(s) serrar.
  • Tenor gust: stampar u scriver a maun la(s) etichetta(s) correspundenta(s) e la(s) fermar cun in bindel vi da la(s) buttiglia(s).

Tip

Avrir la box Serrar la box

Nus servin il sirup cun aua fraida u chauda en proporziun dad 1:5 – 1:7. Il sirup è ideal per dultschir il té ed armonisescha er excellentamain cun schentsch/ingwer.

Artitgels legids il pli savens

Scrollar a sanestra Scrollar a dretga