Legenda:
Tiramisu da salmun servì en in magiel
RTR
temp da preparaziun: ca. 25 minutas
6 magiels da 200 ml
Recept per telechargiar | Rezept zum Nachkochen
Ingredienzas
- 8 talgias da paun da tost
- 2 tschaduns gronds ieli
- 1 avocado pitschen madir
- mango lom (betg memia madir)
- 200 g crème fraîche
- 1 tschadun grond ragisch amara cun groma
- citrona
- sal e paiver
- 1 pugn plain dil
- 200 g salmun fimentà
- 12 tgiradents
Preparaziun
- Furar or dal paun da tost 6 rudellas ch'ins po metter bain en ils magiels.
- Tagliar or da las 2 talgias da tost restantas 12 pignols pli pitschens e pli gronds. Brassar quels en ina padella cun ieli fin ch'els èn lev brins. Cundir cun sal e paiver.
- Spaletschar il mango e l'avocado ed als tagliar en quadrins (ca. 1x1 cm).
- Manizzar fin il dil.
- Maschadar la crème fraîche cun la ragisch amara cun groma, il suc d'ina mesa citrona, il sal, il paiver ed il dil manizzà. Metter da la vart in tschadun grond dil per la decoraziun.
- Emplenir ils 6 magiels en la suandanta successiun: maschaida da crème fraîche, mango ed avocado, salmun, rudella paun da tost, crème fraîche, mango ed avocado, salmun, crème fraîche.
- Per finir plazzar sin mintga tiramisu da salmun in pignol da tost pitschen ed in grond cun agid da tgiradents. Garnir cun in pèr quadrins da mango e d'avocado e cun il dil manizzà.
- Metter a fraid l'avantpast avant che servir.