Siglir tar il cuntegn

Header

In maletg da simbol cun notas sin lingias.
Legenda: Bleras notas spetgan questa fin d'emna sin las ureglias dals fans da chant e musica. PIXABAY
cuntegn

Actualitad musica 3 festas musicalas en il GR: Chant, instrumentala ed accordeon

La fin d'emna dals 4 e 5 da zercladur èn sa rimnads millis musicantas e musicants, chantaduras e chantadurs en 3 differents lieus da noss chantun. Il chant a Poschiavo, l'instrumentala a Lai ed accordeonistas ed accordeonists a Mustér.

audio
Survista festas da chant e musica
ord RTR Audio dals 03.06.2016.
laschar ir. Durada: 2 minutas 3 Secundas.

Propi ina fin d’emna pli che mo emplenida. La schelta è stada gronda. Poschiavo, Lai e Mustér èn stads en il center per bleras chantaduras, chantadurs, musicantas e musicants. Era RTR è stà preschent a tut las festas.

Il logo da la festa da chant districtuala a Poschiavo
Legenda: Il logo da festa. MAD

Poschiavo

Suenter 50 onns ha puspè gì lieu ina festa da chant a Poschiavo. 28 chors cun passa 700 chantadurAs, dirigentAs, expertAs, chanzuns da patg, concert da gala, dus locals da silenzi ed ina tenda da festa – quai ils chavazzins da la Festa da chant dal district Engiadina, Val Müstair, Poschiavo e Bregaglia.

Dus cornets sin ina maisa cumbinà cun il logo da la festa da musica.
Legenda: Lai carmala cun tuns da sturs a sia festa. MAD

Lai

Lai ha purschì suttetg a 1'460 musicantas e musicants a chaschun da gist duas festas da musica. La sonda la festa da musica districtuala dal Grischun central cun 23 societads da musica. La dumengia la terza festa da musica chantunala da giuvenils, nua che 10 musicas da giuvenils da l’entir Grischun èn sa mesiradas.

Survista sin la claustra da Mustér en cumbinaziun cun il logo da la festa federala da harmonicas.
Legenda: Survista sin la claustra da Mustér ed il logo da festa. MAD

Mustér

La Festa federala d’accordeon ha gì lieu per l’emprima giada sin territori rumantsch. Da venderdi fin dumengia èn s'inscuntradas 82 furmaziuns d’accordeon a Mustér. Ellas han concertà 4 differents locals da silenzi cun lur producziuns da patg.

Il logo da la festa da musica federala a Montreux.
Legenda: Il logo da la festa da musica federala a Montreux MAD

Prevista sin la festa federala da musica a Montreux

Il grond punct culminant per millis musicantas e musicants da l’entira Svizra spetga lura in’emna pli tard. A Montreux s’entaupan passa 25’700 musicantAs durant duas fin d’emnas. 15 locals per las producziuns concertantas e 2 tschancuns per la concurrenza da marschar stattan a disposiziun per las 556 musicas. Valitadas vegnan quellas producziuns da 200 experts che derivan da l’entir mund. Quai èn impressiunantas cifras tar la 34avla festa da musica federala.

Tenor ils responsabels è quai in nov record – la festa da musica federala a Montreux saja la pli gronda festa da musica dal mund. Lieu ha quella durant las duas fin d’emnas dals 10 fin ils 12 e dals 17 fin ils 19 da zercladur a Montreux-Riviera – la bellezza citad sper il Lac Léman. Dal Grischun èn 10 musicas da la partida.

Survista d'emissiuns da las festas da chant e musica

Noss Chors07.06.201619:00Festa da chant districtuala a Poschiavo
L Instrumentala08.06.201619:00Festa da musica districtuala a Lai
Artg musical10.06.201622:00Festa da musica federala a Montreux
Artg musical11.06.201622:00Festa da musica federala a Montreux
Artg musical12.06.201614:00Festa da musica federala a Montreux
Noss Chors14.06.201619:00Festa da chant districtuala a Poschiavo
L Instrumentala15.06.201619:00Festa da musica districtuala a Lai
Artg musical17.06.201622:00Festa da musica federala a Montreux
Artg musical18.06.201622:00Festa da musica federala a Montreux
Artg musical19.06.201614:00Festa da musica federala a Montreux
Noss Chors21.06.201619:00Festa da chant districtuala a Poschiavo
L Instrumentala22.06.201619:00Festa da musica chantunala da giuvenils a Lai
Artg musical26.06.201614:00Festa federala d'accordeon a Mustér
L Instrumentala29.06.201619:00Festa da musica chantunala da giuvenils a Lai
Artg musical03.07.201614:00Festa federala d'accordeon a Mustér

Artitgels legids il pli savens