Ensemen cun ils zains van era gest tut las scolaras ed ils scolars dal gimnasi claustral. «Ut unum sint» sa numna quest project. «Ut unum sint» (lat.: ch’ils carstgauns sajan unids) è
- primo in’ovra musicala per chor, orchester, duas solistas e set zains,
- secundo duai igl esser in messadi per la pasch
- e terzio è «Ut unum sint» in viadi da scola particular.
Durant in’emna è l’entira scola claustrala da viadi, 147 scolaras e scolars sin duas bartgas da Basilea a Cologna. Per il chor gimnasial stattan quatter concerts sin il program: a Breisach el Münster, els doms da Speyer e Mainz, ed il punct culminant cun la preschentaziun en il dom da Cologna.
En ils Cuntrasts dals 05.04.2015 vesais la reportascha d’in project musical pretensius e d’in viadi da scola unic.