La festa federala da musica è a fin. Suenter duas fins d'emna intensivas per la regiun Riviera enturn Montreux pon ins uss trer curt in zic flad avant che las activitads da festa cuntinueschan a favur dal giubileum da 50 onns dal festival da jazz Montreux.
Bun'organisaziun, cunzunt areguard transports
Ils responsabels han communitgà lur facit tras e tras positiv. Il president dal comité d’organisaziun, cusseglier naziunal Laurent Wehrli, sco era Valentin Bischof, president da l’uniun federala da musica, èn fetg cuntents cun la 34avla ediziun da la festa federala da musica.
Uschè bain organisatoricamain sco era musicalmain haja tut funcziunà bain. Cunzunt la gronda sfida logistica hajan tut ils incumbensads dumagnà bain.
Entras las grondas distanzas tranter Vevey e Montreux saja il concept da traffic e transport stà la pli gronda sfida. Quel haja funcziunà exemplaric e senza problems, uschia Wehrli.
Il sulet che n’ha betg survegnì ina buna nota dals responsabels è stà Son Pieder per l’aura plitost bletscha. Entras la plievgia, per part intensiva, n’hajan ins betg gì tants aspectaturs sco spetgà.
Grond'acceptanza per il nov reglament da marschar
Tenor il president da l’uniun federala da musica, Valentin Bischof, saja il nov reglament da marschar ch’è vegnì introducì a la festa federala da musica sa cumprovà cumplettamain. Il reglament saja vegnì beneventà ed acceptà da tut las musicas participantas.
Ils resultats da las musicas grischunas
Las musicantas ed ils musicants ch'han visità Montreux l’emna passada pon guardar enavos sin bellas e vastas regurdientschas da festa. Ord vista musicala han las musicas mussà bunas e respectablas prestaziuns a Montreux. Bleras fatschas rientas e cuntentas èn returnadas enavos en la patria.
Ils resultats dals grischuns a Montreux
| puncts toc da pensum | puncts toc da pag | rang | categoria | lieu | |
|---|---|---|---|---|---|
| Musica da Domat | 91 | 94.33 | 4 | 2. classa BB | Théâtre Le Reflet, Vevey |
| Societad da musica Panaduz | 93 | 92 | 4 | 3. classa BB | Salle Rambert C, Clarens |
| Uniun da musica Sagogn | 84.33 | 91.67 | 16 | 2. classa BB | Salle Rambert B, Clarens |
| Musica Concordia Müstair | 88 | 90.33 | 8 | 3. classa BB | Eglise Sainte-Claire, Vevey |
| Jugend BB Imboden Domat/Ems | 88 | 89 | 10 | 3. classa BB | Eglise Sainte-Claire, Vevey |
| Societad da musica Breil/Dardin | 91 | 84 | 12 | 3. classa BB | Eglise Sainte-Claire, Vevey |
| Societad da musica Flem | 76 | 83 | 25 | 3. classa BB | Salle Rambert C, Clarens |
| Musikgesellschaft Untervaz | 74 | 67 | 30 | 3. classa BB | Salle Rambert C, Clarens |
| Musikgesellschaft Grüsch | 87.67 | 83 | 15 | 3. classa H | Salle Rambert B, Clarens |
| Cuminanza da las musicas Ardez, Ftan, Scuol, Sent, Tarasp | 85 | 79 | 20 | 2. classa H | Eglise Sainte-Claire, Vevey |
Gronda sfida finanziala per las musicas
Sa participar ad ina festa da musica federala na munta betg mo ina sfida musicala per dirigents, dirigentas, musicantas e musicants. Era finanzialmain dovra quai in grond engaschi dals funcziunaris. Ina tala festa chaschuna custs da blers millis francs.
RTR ha pudì analisar il budget da festa da la societad da musica da Panaduz. La musica cun 40 musicantas e musicants ha budgetà ina summa da CHF 16’000 per sa püarticipar a la festa. Ils da Panaduz èn partids venderdi envers Montreux ed èn turnads la dumengia. «Per vegnir da finanziar quest grond burdi ha quai duvrà gronda prontadad dals commembers e commembras, els pajan sez ils custs da hotel» uschia il president Gieri Cathomen.
Custs per ir a la festa federala (exempel societad da musica Panaduz)
| cartas da fiasta | CHF 4'000 |
| viadi | CHF 3'000 |
| 2 notgs hotel | CHF 8'000 |
| custs d'administraziun | CHF 1'000 |
| total | CHF 16'000 |
| custs da festa/musicant | CHF 400 |
RTR ha registrà ed emess directamain da Montreux
En collavuraziun cun las autras unitads da la SSR è RTR stà preschent a Montreux e ha registrà tut las producziuns concertantas da nossas musicas dal Grischun. Plinavant ha la SSR producì differents concerts da divertiment en la tenda «Scène SSR» sper il center «2m2c».
Ils tocs da festa dals Grischuns sco era parts dals concerts da divertiment èn vegnids rimnads en 6 emissiuns «Artg musical spezial».
