Siglir tar il cuntegn

Festas da musica Impressiuns da la festa federala da musica a Montreux

Millis e millis musicantas e musicants e dieschmillis aspectaturs èn sa rimnads a Montreux per giudair ils dis da festa. Montreux – la gronda citad da cultura – ha mess a disposiziun ina bella e vasta purschida per ils visitaders.

La segunda sonda

Entras la bun’aura e las empernaivlas temperaturas è quai stà il di cun ils pli blers visitaders a Montreux. Tant la promenada da festa a Montreux, sco era ils tschancuns da concurrenza da marschar ed ils lieus da producziuns concertantas èn stads bain visitads.

In mument istoric ha gì lieu la saira en l’Auditorium Stravinski. Géo-Pierre Moren, il grond piunier da brass dal Valais, ha gì ier derniera sco dirigent da la «Concordia Vétroz». 1981 ha el dirigì l’emprima giada ad ina festa federala da musica è quai stà l’otgavla e l’ultima festa federala da musica. Suenter avair preschentà ina extraordinari buna producziun da las duas cumposiziuns da pag e da pensum – cumponidas da ses figl Bertrand Moren – han ils da Vétroz astgà retschaiver in fervent applaus dals auditurs. Quai en spezial era areguard la gronda prestaziun dal dirigent a favur da la musica da sturs.

Legenda: Guardar il video «Applaus frenetic per piunier vallesan Géo-Pierre Moren tar derniera». Durada 0:59 minutas.
Dals 19.06.2016.

Il segund venderdi

Suenter curt temp da flad per la bella citad a la Riviera ha cumenzà la segunda part da la festa. I spetgan anc ina giada passa 300 musicas vess da pudair vegnir a Montreux ed as mesirar en las differentas categorias.

L'emprima dumengia

Uschia sco il segund di da festa aveva terminà ha il terz di cumenzà: vias plainas cun musicantas e musicants en unifurmas da tut las colurs. Dal Grischun han oz sulettamain duas musicas gì da sa preschentar avant ils experts. L’uniun da musica Sagogn en segunda classa e la brass band da giuvenils Imboden en terza classa. Omaduas musicas han sunà avant in grond public ed han mintgamai astgà racoltar in fervent applaus per lur prestaziuns.

L'emprima sonda

Bleras musicantas e musicants ed in vast program derasà sur l’entira Riviera da Montreux enfin Vevey: Quai è stà il segund di da festa. Nossas musicas grischunas èn sa preschentadas cun bunas preschentaziuns avant ils experts. Dirigents e musicants tiran ina bilantscha positiva.

L'emprim venderdi

A Montreux n’han ins betg spargnà cun infrastructura e purschidas per la festa da musica federala. La promenada sper il lai, il center «2m2c» e ses conturn sco era ils lieus da festa ordaifer il center da Montreux èn plains cun stans da bavrondas e spaisas e stans d’infurmaziun. Dapertut chattan ins tribunas per concerts ed autras purschidas. Ils participants ed ils giasts duain sa sentir bain a Montreux e mantegnair la festa en buna memoria - quai sentan ins immediatamain davent ch’ins arriva a Montreux.

Nua ch’ins guarda, dapertut vesan ins ils gidanters da la festa cun t-shirts blaus – millis voluntaris èn s’annunziads per las duas fin d’emna. Plaunsieu arrivan er ils musicants a Montreux ed i ha cumenzà a dar vita musicala per las vias enturn. A partir da las 19:00 èsi lura vegnì serius per las emprimas musicas. Las producziuns concertantas avant ils experts han cumenzà.

RR actualitad 07:00