La chantadura irlandaisa Sinéad O'Connor è morta cun 56 onns. Quai rapportan medias irlandaisas sa referind sin sia famiglia. Ses pli grond hit ha O'Connor gì il 1990 cun «Nothing Compares 2 U» che Prince aveva scrit. En tut ha la chantadura irlandaisa publitgà 10 albums da solista, ha scrit chanzuns per films ed era cooperà cun auters artists.
Sinéad O'Connor è naschida 1966. Sia mamma è morta 1985 tar in accident cun auto. Ad ella renfatscha O'Connor d'avair maltractà ella sco uffant. La chantadura è adina puspè crudada si cun acziuns e messadis cuntravers. Per exempel ha ella stgarpà 1992 en ina show americana in maletg dal papa sco protest cunter ils scandals da maldiever d'uffants en la Baselgia catolica.
En ils onns 90 è ella daventada sacerdota dad ina gruppa pitschna catolica, 2018 è ella lura convertida tar l'islam. Ils ultims onns ha O'Connor discurrì da problems psichics. Avant bun in onn e mez ha ella pers ses figl ch'aveva be 17 onns.
Or da l'archiv: curta biografia e ses hit
