Aita Biert e Men Steiner èn oriundamain da Scuol. Aita è magistra da clavazin e terapeuta da musica. Sco uffant udiva ella savens a chantar a ses bab, Cla Biert, a sia mamma Angelica ed a sia onda Stasia, e la chanzun populara rumantscha è daventada per ella in stgazi tut spezial ed ella ha scuvert il bel effect da las melodias simplas.
Las chanzuns èn in stgazi en mia memoria e tutgan tar mia educaziun musicala la pli preziusa.
Men Steiner e stà magister e redactur tar RTR, ha sunà blers onns tar ils Fränzlis da Tschlin ed er cun autras furmaziuns. El era in grond amatur da las chanzuns popularas da Men Rauch e perquai ha el er emprais a sunar la ghitarra.
Mes instrument è l’emprim stà la gìa. Pir suenter hai jau emprendì da sunar la ghitarra e quai cun il cudesch da Men Rauch «Chanzuns per guitarra».
La fin dals onns 60 era Men Steiner a Turitg per ses studi da magister secundar e pli tard per dar scola. Durant quels onns ha el suna savens tar inscunters da students en la «Öpfelchammer».
Pli tard era Men savens sin visita tar ils Bierts che abitavan lura er a Cuira, per chantar e sunar la ghitarra, ed el preschentava er sias atgnas chanzuns. Aita e Men han lura cumenzà a chantar sco duo.
Ils emprims concerts
In dals emprims è sta il 1976 en la Klibühni a Cuira e quai è er sta l’ultim concert che Aita ha chantà cun ses bab. Dapi quella giada han Aita e Men chantà sco duo e fatg sur 100 concerts, en pitschens ravugls, ma er per festas dal 1. d'avust a la televisiun, a Paris cun ina gruppa da jazz o a Minca en la gronda Sedlmayerhalle en occasiun d'ina festa internaziunala da folclora. Bellas regurdanzas datti er dal festival da folk a Lenzburg en il giardin dal chastè.
Enturn il 1985 ha Men Steiner cumenzà a sunar cun ils Fränzlis e lura hai dà ina lunga pausa.
Lur passiun: las chanzuns popularas rumantschas:
«Giodim in quella val», «Il bel Bernard», «Saira per saira»,«Il silip e la furmia» e bleras autras.
Il 1982 registreschan els il disc «Aita Biert, Men Steiner ed ils Fränzlis da Tschlin: Chanzuns. Lieder und Tänze aus dem Engadin». Sin quel disc vegnan els accumpagnads dals Fränzlis, quella giada cun Domenic, Duri e Curdin Janett, Flurin Caviezel ed Arnold Alder. Da quella furmaziun datti pli tard ils Fränzlis da Tschlin, cun Men Steiner che suna la gìa.
La turnea da cumià
Suenter ch’els han fatg chant e musica durant pli che 50 onns èsi stà temp da sa retrair dal palc. Perquai datti uss la turnea da cumià cun concerts a Zuoz, Segl, Valchava e Sent – e quai cun in sguard enavos e blera nostalgia.