L’onn passà hai dà en il Grischun 257 animals stgarpads dal luf. Perquai è Mario Alig sa decidì da far diever da l’offerta da la Confederaziun: el ha cumprà dus chauns da protecziun da muntaneras. Organisà l’entira chaussa per el ha l’uniun Agridea, che fa questa lavur en il num da la Confederaziun. Mario Alig ha uschia survegnì dus chauns da muntogna da las Pireneas, Amy e Kira, duas chognas da dus onns.
Davent da l’arrivada a Vrin, il s’acclimatisar, la chargiada, la vita ad alp, la stgargiada ed il return a chasa tar Mario – la reportascha documentescha l’emprim onn dals dus chauns tar Mario Alig e sia dunna Jovita a Vrin.
Tranter Nadal e Bumaun èn els arrivads: l’elevatur Stefan Sprunger cun quests dus chauns, ch’el ha tratg si e scolà sco emprims, Amy ed Akira. Fredi Bernet da l’uniun Agridea accumpogna els quel di. El vegn a gidar Mario Alig durant l’entir onn tar dumondas cun ils chauns e cun la muntanera.
Las nursas da Mario acceptan ils dus chauns fitg spert en stalla. Era cura ch’ils tschuts naschan èn ils chauns preschents. Els enconuschan uschia ils tschuts ch’els ston pertgirar davent da l’emprima minuta.
Quant bain ch’Akira ed Amy lavuran, sa mussa per l’emprima giada la fin da l’enviern. Lunsch davent da la stalla han ellas da proteger las nursas sin prads verds enturn il vitg. Oravant tut èn ils chauns prevesids per la stad sin l’alp da Vrin, in enorm territori, vast, malruassaivel e taiss. Per uschia ina muntanera gronda da bunamain 900 chaus fissi meglier d’avair 4 chauns – gliez è previs per l’auter onn. Il nurser Till Hailer e sia gidantra Marie Brandt èn cuntents cun la prestaziun dals chauns. Ed era Mario Alig è la fin finala bel led cura ch’ils tschuts, las nursas ed ils dus chauns èn puspè sauns sin il prà avant stalla.