Chanzuns polifonas pretensiusas, dus dirigents, ilarica e cumpagnia: Aschia pudess ins resumar la sentupada da la fin d’emna cun il Chor mischedau Rueun-Siat. Cun ina «soirée» la sonda ed ina «matinée» la dumengia ha quel festivà il term da 30 onns.
L’emprima part è stada en la baselgia parochiala da s. Andriu. Audituras ed auditurs ch’èn entrads en baselgia n'han retschavì nagin program. In tal n'ha il chor sapientivamain betg mess a disposiziun. Cunquai n'han ins gì nagut auter che giudair a partir da l’entschatta fin la fin.
La premiera dal dirigent
Durant il temp che Gion Tschuor ha dirigì il chor, dal 1995 enfin il 2024, è quel sa participà cun grond success a festas e festivals. El ha dà 20 concerts e preschentà quatter musicals. Il dirigent sez ha scrit e producì quels cun sias chantaduras e ses chantadurs, mintga giada èsi stà ina prestaziun collectiva che ha fatg furora.
Per il giubileum da 30 onns è quai chor sa preschentà cun il successur da Gion Tschuor. Lez ha surdà la batgetta al figl Dario Tschuor. Uschia è il concert da giubileum gist stà la premiera dal dirigent nov. Cun plaschair han ins dastgà constatar che la prestaziun collectiva è sa mantegnida. En il center èn ils tuns stads, ed in chant cultivà.
La cumposiziun «Neiv da Daniev» da Gion Andrea Casanova n'è betg simpla. Quai che ha tunà lev, equilibrà, dramatic e cumplain, ha il chor dentant stuì exercitar. La chanzun vul mussar il maletg dal carstgaun che va cun pass senza paisa sin il trutg, tras la naiv che sbrinzlava en il sulegl. Aschia ha il chor interpretà quels pleds dad Arnold Spescha.
Arvo Pärt e Gion Andrea Casanova
Era la chanzun da durmentar «Gjendines badnalat» han las moderaturas Pierina Dolf-Tschuor e Denise Degonda-Simmen annunzià e confermond ch’il dirigent haja duvrà pazienza cun ellas ed els. Ch’i haja valì la paina ha l’auditori pudì percorscher.
A partir da l’emprima fin la davosa chanzun han ins udì ovras dètg pretensiusas per in chor d’in vitg. Respectiv da dus vitgs, pertge las 24 chantaduras e chantadurs èn da Rueun e Siat. L’onn 1995 è quel sa furmà, l’emprim ord la fusiun dals chors a Rueun. Indesch onns pli tard è quella s’extendida cun integrar chantaduras e chantadurs dal chor mischedau Siat.
Per ses giubileum da 30 onns ha il Chor mischedau Rueun-Siat elegì chanzuns che chors ambizius porschan per ordinari. L’auditori ha tadlà inscenaziuns en furma vocala. Uschia per exempel la cumposiziun «Patratgs el vent» ch’il dirigent Dario Tschuor ha fatg per il chor.
El ha era scrit ils pleds d’ina ovra fluenta ch’entschaiva cun in mezzopiano, va en in pianissimo, accellerescha en il fortissimo e finescha puspè cun pianissimo. Ils quatter registers cumpacts han dumagnà quella sfida.
Inqualins en l'auditori pon avair gì pel-giaglina tar l’interpretaziun da «Da pacem Domine» dad Arvo Pärt da l'Estonia. Era quai in’ovra che pretenda buna preparaziun ed exactadad, cunzunt in flad equilibrà. Il medem vala per «Ave Verum Corpus», ina classica da W. A. Mozart ch’il chor ha chantà.
Reminiscenzas dals musicals
Suenter il concert en baselgia han il chor ed ils visitaders e las visitadras midà en la halla plurivalenta. Là era l’aperitiv semtgà, igl ha dà in apéro riche ed il chor ha chantà pliras chanzuns or da musicals. Tranter auter han Svenja Tuor e Rafael Spescha delectà cun il duet da Nuscha e Toni, ina scena dal davos musical «Adia Surselva – hello New York» da l'atun 2017.
A la fin ha il chor undrà set chantaduras e chantadurs ch’èn dapi l’entschatta fidaivels a quel. Igl èn Antonia Simmen, Marlis Camiu, Giuanna Tschuor-Candinas, Conrad Camiu, Armin Cadalbert, Ursin Candinas sco era il dirigent Gion Tschuor. In’exposiziun audiovisuala dals 30 onns passads e dals quatter musicals han cumplettà l’occurrenza giubilara dal Chor mischedau Rueun-Siat.