Durant ses megliers onns da la carriera è sia vita vegnida messa sin il chau, dad in mument sin l’auter. Capità èsi durant in gieu da campiunadi cunter Losanna il november 2018. Il defensur dal HCD, Claude-Curdin Paschoud, ha survegnì in puck en in’ureglia e silsuenter patì sur onns d’ina greva scurlada dal tscharvè. Enstagl dad ir sin il glatsch èsi stà da far terapia e terapia. Durant quest temp haja el schizunt er ponderà da terminar la carriera. Il defensur rumantsch n’ha però betg dà si ed er grazia ad ina terapia speziala ad Arizona en ils Stadis Unids ha el surmuntà questa frida.
Quest accident ha midà ina massa e giugar hockey era lunsch davent. Impurtant era per mai da vegnir tras il di senza sintoms e mals.
Il 2022 ha el pudì dar ses comeback cun il HCD, quai gist en ils playoffs. Insatge bun ha quest accident però er gì: ad Arizona ha Claude-Curdin emprendì d’enconuscher la fisioterapeuta Hally. L’atun passà èn els maridads.
Tuttenina sin il glatsch cun ils gronds idols
Claude-Curdin Paschoud è naschì e creschì si a Tavau ed è uschia gia baud vegnì en contact cun il hockey sin glatsch. Avant 12 onns ha el dà tar il HCD ses debüt en la liga naziunala A, quai sut la batgetta da la legenda Arno del Curto, il trenader ch’ha furmà Paschoud tar in top defensur en Svizra. Da pitschen eran giugaders sco in Reto von Arx und in Beat Forster ses gronds idols. E cura ch’el saja vegnì clamà en il cader eran quels anc adina en gardaroba, di Paschoud che n’avess betg cret pli baud dad ina gia pudì far carriera da hockey sin quest nivel.
Ina gia HCD – adina HCD. Quai han ins pudì pensar tar Paschoud. A la fin da la stagiun 2022/23 n'ha Tavau però betg pli prolungà ses contract, ina decisiun ch’ha procurà per grondas undas, cunzunt tar ils fans che n’han betg chapì questa decisiun dal HCD. Paschoud ha però chattà in nov sut tetg tar il SC Berna. Suenter ina stagiun tar in dals gronds clubs insumma en Svizra ha il defensur rumantsch pudì suttascriver in contract da dus onns tar ils SCL Tigers a Langnau. Là è el uss tranter auter er collega d’equipa da Claudio Cadonau, uschia ch’i vegnia magari schizunt discurrì rumantsch en gardaroba, di Paschoud.
«La Cuppa Spengler è per mai adina stada insatge fitg grond»
Il temp tranter Nadal e Bumaun è er temp da hockey. Durant passa 100 onns vegn giugà a Tavau la Cuppa Spengler, il turnier tradiziunal ch’ha er adina gì ina gronda muntada per Claude-Curdin Paschoud. Sco buobet na vulevi el sa chapescha manchentar betg in sulet gieu a la televisiun.
L’emprim hai jau vendì M&M’s en il stadion, pli tard er jau mez sin il glatsch a la Cuppa Spengler, e quai cun plirs da mes gronds idols.
Pli tard sco junior dal HCD saja lura er stà da sa gidar en il stadion, tranter auter cun vender M&M’s. Mo quai haja el fatg fitg gugent, uschia il defensur da 30 onns. Uschia eri el numnadamain fitg datiers dal glatsch e pudevi er contemplar quels gronds stars a giugar hockey. Durant ses temp tar il HCD ha Paschoud er sez pudì giugar durant tschintg onns a quest turnier da chasa. Per il titel n’hai però mai tanschì. Quai che resta sajan las grondas emoziuns, la festa da hockey e cunzunt er ils duels cun il Team Canada.
Betg sulet il bastun da hockey, er la palutta da cuschinar ha Paschoud enta maun
Claude-Curdin Paschoud na fa betg mo ina buna figura sin il glatsch, oz sco defensur dals SCL Tigers, mabain er en cuschina. Il cuschinar saja daventà ina da sias grondas passiuns. Cumenzà haja quai durant ses emprims onns cura ch’el vivevi persuls. Per avair insatge bun sin il taglier haja el cumenzà a cuschinar adina dapli, vitiers haja el cumprà adina dapli cudeschs da cuschinar ed oz saja quai in grond hobi.
Jau na sun betg cuschinier da gourmet, ma mia lasagne è propi fitg buna.
En il temp liber legia Paschoud er fitg bler, il pli gugent romans dal scribent brasilian Paulo Coelho. Cumenzà a leger haja el cunzunt suenter sia blessura vid il chau damai che mirar televisiun na fascheva betg bain. E lura gidi il leger er da vegnir in pauc surengiu, cunzunt suenter in gieu da hockey plain adrenalin. Ed a cor stat a Paschoud era sia vespa originala ch'è 40 onns veglia. Quella haja el cumprà a Tavau ensemen cun ses anteriur collega d’equipa Enzo Corvi. Cun quella giaudi el cunzunt la stad da far in viadi insanua dasper in lai.
Return enavos a chasa a Tavau
Con ditg che sia carriera cuzza anc na po Claude-Curdin Paschoud betg dir. El miri da stagiun tar stagiun, mo la finamira na saja betg da giugar hockey fin 40, el na saja betg in Andres Ambühl di il defensur cun in surrir. Per il mument saja el fitg cuntent a Langnau nua ch’el po uss ina giada giugar las proximas duas stagiuns. Suenter sia carriera ha Paschoud però il giavisch da puspè turnar a Tavau. Quai saja sia patria, ses da chasa. E sche tut giaja tenor plan fiss il giavisch lura er da surpigliar la fatschenta da sport dals geniturs che sa chatta gist dasper il stadion da la cuppa mundiala da passlung.