Ellas vegnan a dar en locaziun u vender ils bajetgs ch'ellas na dovran betg pli per l'agen diever. In exempel concret è l'«Albertushof» ch'è actualmain mess en vendita. Il possess agricul n'è gia dapi in temp betg pli in sectur che las soras dominicanas mainan. Il cussegl da fundaziun da las soras dominicanas ha d'evaluar cun agid da spezialists, tge che faschess economicamain pli bler senn, uschia la priura generala, sora Annemarie.
Quest pass è per nus ina sfida. Nus na pudain betg guardar èn il futur e nus duvrain agid da persunas dal fatg.
Il motiv principal per quest pass saja la digren da la cuminanza dominicana a Glion, di la priura generala. Las soras na survegnan naginas novas commembras e la vegliadetgna media da las soras è sur otganta onns. Quest signifitga che las soras èn memia veglias per pudair lavurar en l'agen manaschi sco er en l'economia privata. Pli baud eran ellas surtut activas en la tgira, en il sectur social ed en la scolaziun. Las entradas or da questas activitads eran impurtantas per la communitad. En quest punct hajan las soras dominicanas ademplì lur incumbensa, uschia sora Annemarie. Oz ston ellas surdar las lavurs ad emploiadas ed emploiads ed èn cun in manaschi da 70 collavuraturs e collavuraturs ina da las impurtanta patrunas en la regiun. Dapi 2021 pon persunas externas daventar commembras dal cussegl da fundaziun. In sguard sin l'organigram mussa plinavant che persunas dal fatg mainan las bleras partiziuns.
Dievers alternativs en accord cun la vita claustrala
En las localitad nua che la claustra aveva in a scola ed in internat enfin ils onns otganta, han las soras dominicanas avert la chasa da sentupada, per tudestg «Haus der Begegnung». Las soras porschan uschia in lieu d'albiert e da scuntrada, saja quai per far vacanzas u per seminaris ed eveniments. Questa midada d'utilisaziun saja in success e l'idea saja che la chasa da sentupada vegnia da sa purtar finanzialmain sezza, uschia la priura, sora Annemarie. Cun il Forum per la cultura da pasch e l'«Ilanzer Sommer», ina occurrenza tematica tar il tema da pasch, haja la claustra attratg nova glieud en lur localitads. La lavur strategica giaja dentant vinavant.
La Regiun Surselva ha affittà las localitads da scola en la claustra ed en la «Casa Vinavon». Ella vegn a dischlocar ses lieu d'instrucziun en il center da Glion tar la staziun. Cunquai che quest pass capita però per il 2027 u 2028, hajan las soras dominicanas bain ponderà tge auters dievers che vegnissan en dumonda. Ellas fetschian il mument ina pausa tar la reflexiun d'in diever futur, perquai che la bardigliada è per en in pèr onns.
La claustra, il monument architectonic
Las soras dominicanas vivan en in bajetg marcant che giascha sin la spunda da Quinclas sur Glion. Fin dals onns sessanta han las soras incumbensà l'architect da Turitg, Walter Moser.
L'um ch'ha ussa passa novanta onns, ha bajegià 17 baselgias novas e renovà anc dapli bajetgs sacrals durant sia vita. El sa regorda gugent vi da la claustra da Glion, ina da sias pli impurtantas ovras.
Quest è stà ina grondiusa incumbensa, er pervia da las pussaivladads ch'ins aveva.
Walter Moser ha lavurà sco giuven architect dus onns a Helsinki tar l'architect da renum, Alvar Alto. L'influenza saja visibla, di Walter Moser. L'architectura è modesta ed armonisescha cun la natira. Savens cumpareglian ins la claustra da Glion cun la claustra Sainte-Marie de la Tourette en Frantscha dal renumà architect Le Corbusier. Tenor l'architect turitgais saja quai pervia da las pitgas en las spunda che portan ils bajetgs. Per l'auter saja il stil da Le Corbusier pli rubiesti cun il betun brut. Lez haja er construì ina curt serrada, tge ch'è tar la claustra da Glion auter. La curt e averta encunter sid e sias fatschadas èn simplas ed alvas sco l'habit da las soras dominicans. Plinavant han las lavurs dal sculptur Alfred Huber e las fanestras baselgia da Max Rüedi procurà per ina ovra atemporala.
