La giuvna chantautura da Glion amez il studi da musica ed il musicist multifar e globtrotter Tumasch è – Quai è ina cumbinaziun explosiva ed exclusiva per la proxima ediziun da la «Late Lounge Live». Ma tuttina sa dumonda ina u l’auter tgi pomai che quels dus èn – qua la resposta:
Paula Mia – Dachasa davos la tribuna
Sco bleras musicistas ha era Paula Mia udì blera musica a chasa dada vinavant da ses geniturs. Damai che la mamma da la chantautura organisescha dapi insaquants onns concerts en il «Cinema sil Plaz» a Glion ha ella passentà bler temp davos las culissas. Ha vis soundchecks e concerts, ha accumpagnà musicistas e musicists avant, durant e suenter lur preschentaziuns. Uschia ha ella sper la passiun per la musica era chattà l’interess vid la lavur d’organisar concerts. La passiun ha manà ella il 2020 a la ZHdK (Scola auta turitgaisa dals arts) nua ch’ella studegia musica da jazz. A l’interess da la lavur davos las culissas po ella sa deditgar en il «Kaufleuten» a Turitg e dapi curt era en il Cinema sil plaz.
Per il mument fa la giuvna in semester en l’exteriur a Gent en Belgia. Là lavura ella vid ses project da Bachelor ed ina EP che avess da cumparair il 2023.
Tumasch è – da selvadi fin quiet
Per ils ins è el Tumasch è, per ils auters Tartaruga ed anc ina giada auters conuschan el sco Thomas Cathomen. Il musicist da Breil ha publitgà sia emprima chanzun «Fretgs dultschs» l’onn 1999 – l’onn che Paula Mia è naschida. Trais onns pli tard ha el publitgà ses album da debut «Tartarugapop» e cun quai gì success en la Rumantschia. Quella ha el dentant curt suenter bandunà per sa deditgar a novs projects e per turnar tar sias ragischs a Mexico.
Avant curt ha el publitgà ina rimnada da sias fassettas musicalas. Cun chanzuns da l’entschatta da sia carriera, chanzuns dal Mexico e chanzuns actualas. Quai cun texts e melodias variantas, plaunas, spertas, seriusas e narras, per rumantsch, englais, spagnol e tudestg.
