Victur en la categoria «chanzun populara»
Il Consonus vokalensemble ha gudagnà la concurrenza da chanzuns popularas da la 59avla concurrenza internaziunala da chors a Spittal sper la Drau en l'Austria. Il chor cun chantadurs e chantaduras dal Grischun, da la Svizra Orientala, Turitg e Lucerna, ha fatg 93 puncts, in mez punct dapli ch'il chor «Maranatha Christian University Choir» da l'Indonesia. Quai rapporta ORF sin sia pagina online (consonus parta davent da 01:32:55). Consonus ha persvadì cun chanzuns en tuttas linguas naziunalas: «Nidwaldner Tanzliedli», «Quattro cavai che trottano» dal Tessin, la chanzun rumantscha «Cur chi vain la not» e «Adyu mon bi Payi» en ina lingua franzosa veglia.
Segund en la concurrenza da la «chanzun d'art»
En la concurrenza da sonda è l'ensemble svizzer vegnì segund. Questa giada èsi stà gist il cuntrari da la rangaziun tar las chanzuns popularas. Il chor «Maranatha Christian University Choir» da l'Indonesia ha cun 93,5 puncts fatg in mez punct dapli ed uschia gudagnà quella part. Consonus ed ils auters chors han gì da preschentar in program obligatoric cun «Herr, nun lässest du» da Felix Mendelssohn-Bartholdy, «Come gentle swains» da Michael Cavendish ed ina cumposiziun contemporana da Martin Stampfl: «Pseudea». La saira ha lura mintga chor pudì preschentar ses program da patg. Consonus ha avert cun ina chanzun da Flavio Bundi «Il grond silenzi», lura «Tenebrae factea sunt» da Robert H. Young e terminà cun la motetta baroca «Cantate domino» da Claudio Monteverdi.
Gudagnà il premi dal public
Sco bella finiziun da la concurrenza ha l'ensemble vocal pudì chantar la dumengia en il chasté Porcia al concert dals premiads ensemen cun ils auters chors che han gudagnà premis. Il chor svizzer ha muventà il publicum cun il «Nidwaldner Tanzliedli» e cun la chanzun giavischada da la giuria «Come gentle swains». Sco finiziun da ses concert ha consonus chantà «Tenebrae factae sunt». Il publicum ha dà grond applaus ed engrazià cun ina standing ovation. Il publicum ha lura er dà las pli bleras vuschs a l'ensemble vocal consonus. Lez ha engrazià cun chantar la chanzun «La sera sper il lag».
La concurrenza internaziunala da chors a Spittal è ina da las pli renumadas dal mund.
Or da l'archiv: