Tgi ha mazzà Giovanni Cajacob? E co, cura e daco? A quellas dumondas èn sa deditgadas sis acturas ed acturs laics en l'emprim crimi dinner televisiv «Mortori a…». «Mortori a…» è in nov format da Radiotelevisiun Svizra Rumantscha per tuts fans da crimi e da teater. En in gieu da teater improvisà emprovan las sis acturas ed acturs numnadamain da chattar ora tgi dad els ch'è il u la malfatschenta.
Participar
Vus savais franc gia tgi ch'è la culpa dal mortori – almain, sche Vus avais guardà il video.
Enfin venderdi ils 17-9 era quai pussaivel da dar giu in tip per gudagnar in bon en valur da CHF 150 per in restaurant. Ed uss? Ma spetgar sin il proxim «Mortori a…» ;).
Quai è franc stà il plevon u in chatschadur?
Cler. Sco adina. Il plevon! Mettain! U èsi forsa tuttina stà la pictura dal vitg u forsa il turist da chatscha che vegn da la bassa en vacanzas en la vischnanca da l'emprim «Mortori a…»? Tgi èsi stà? Quai è il grond misteri per il qual ch'i va en il dinner televisiv.
Ed anc in per tips u forsa indizis per vias pulainas dapli? Vualà
Engiadina u Surselva – tgi è l'assassin-a?
Per l'emprim «Mortori a…» derivan ils acturs laics mez e mez or da la Surselva ed or da l'Engiadina. Da la partida èn Braida Pinggera da Sent, Erich Pfranger da Scuol, Otto Quadroni da Ftan. Da la Surselva fan part: Flavia Cahenzli da Glion, Michela Projer da la Lumnezia e Denis Marmy da Vuorz. Els giogan mintgamai ina rolla fixada ordavant. Text n'han els però stuì emprender nagin – tut è teater improvisà. Tgi ha gì la finala la meglra preschentaziun e tgi ha chattà ora la malfatschenta u il malfatschent… l'Engiadina u la Surselva?
Adina puspè en in auter lieu
Per l'emprima episoda è RTR sa decidì da far las registraziuns en il restaurant Parlatsch a Trin Mulin. Uschia èsi pia capità in «Mortori a Trin Mulin». Parlatsch? Exact: Quai è l’ustaria giu sper la loipa da passlung. Per las episodas futuras dependa il lieu in zic da tge uniun da teater che gudogna il «Mortori a…». En il futur duai quai numnadamain dar in cumbat tranter las uniuns da teater: Tgi chatta la malfatschenta e lura sa chapescha: Tge uniun da teater ha las acturas, ils acturs ils pli persvadents? E l'uniun che chatta il malfatschent definescha alura en tge vischnanca resp. vallada ch'il proxim crimi dinner televisiv duai avair lieu.
Era en La Quotidiana
Adatg: indizis spezials datti dals 13-09 fin ils 17-09 era mintga di en La Quotidiana.