En cumparegliaziun cun auters conflicts èsi spezial, che la glieud da la Strivla da Gaza ha nagina pussaivladad da bandunar lur pajais.
Vinavant accentuescha Judith Schuler ch’i saja grev da vegnir cun agid en la Strivla da Gaza. Ed era da reparter quest agid a quels che dovran quel il pli fitg.
Conto per il proxim Orient
Rimnà vegn per il Proxim Orient. Cura ch’ins haja cumenzà a far ponderaziuns davart in agid pussaivel, na saveva la Chadaina da Fortuna anc betg sche la crisa sa derasa en l’entira regiun. Perquai han ins decidì da numnar il conto «Proxim Orient», per pudair gidar nua che la miseria è la pli gronda.
Fin uss ha la Chadaina da Fortuna finanzià en il Proxim Orient otg projects cun ina valita da dus milliuns francs. Tut ils daners èn ids en la Strivla da Gaza nua che la glieud cumbatta per surviver. I fiss bain er pussaivel da sustegnair projects en l’Israel. Ma la miseria saja là sin in auter livel ch’en la Strivla da Gaza.
La Chadaina da Fortuna è in’organisaziun umanitara, nunpartischanta e neutrala e guarda be sin ils basegns da la glieud pertutgada.
Partenaris
La Chadaina da Fortuna lavura ensemen cun ovras d’agid sco Heks u Terre des hommes che s’engaschan gia dapi blers onns en la Strivla da Gaza. In criteri impurtant saja che l'agid giaja directamain a las persunas pertutgadas. Ina garanzia che naginas persunas da la Hamas na survegnan agid da la Svizra na po Judith Schuler betg dar. Quels sajan er ina part da la populaziun.
Per evitar che per exempel cumbattants da la Hamas survegnan agid da la Svizra dattan ins quel savens directamain en ils mauns da las dunnas.