Durant la stagiun da skis 2023–2024 han bleras destinaziuns mess sin il pretsch dinamic, il uschenumnà «Dynamic Pricing». SRF ha rimnà ed evaluà automaticamain ils pretschs. Quai che dat en egl: 100 francs u dapli per ina carta dal di è oz en divers territoris da skis normalitad. Ed era en la prevendita èn ils pretschs s'augmentads.
A Laax han ins pajà l'onn passà – sper San Murezzan e Zermatt – en media il pli bler per ina carta dal di. En media ha il visitader pajà 97 francs. Memia bler? Reto Gurtner, president dal cussegl d'administraziun e delegà da la gruppa Arena Alva, cuntradi. «Ir cun skis è ozendi bler memia favuraivel», uschia Gurtner. Il maximum da pretschs na saja anc ditg betg cuntanschì. «En 10 onns vegn ina carta dal di a custar a Laax tranter 200 e 300 francs», uschia Gurtner en l'emissiun «50:50» da Radiotelevisiun Svizra Rumantscha RTR e Somedia.
En cumparegliaziun cun dar golf è l'ir cun skis ozendi bler memia favuraivel.
D'ina vart haja quai da far cun la chareschia. Da l'autra vart vegnia a s'augmentar il chatsch sin quels territoris che possian er en l'avegnir porscher cun segirtad sport d'enviern. Gurtner è persvadì ch'i dettia er en l'avegnir avunda persunas ch'èn prontas da pajar quels pretschs. Sch'ins cumpareglia la purschida d'ir cun skis u snowboard per exempel cun dar golf, vesian ins era là che la glieud saja gia oz pronta da pajar enfin 1'000 francs per ina runda golf.
10 dumondas a Reto Gurtner
- Crescher u consolidar? Crescher
- Naiv artifiziala u naiv natirala? Naiv natirala
- Candinas u Martullo-Blocher? 50:50
- Vacanzas a la mar u en muntogna? Tuts dus
- PS u PLD? Tuts dus, dentant sun jau plitost in liberal
- Ski u snowboard? Tut segund
- Decider en il team u decider sulet? Decider en il team
- Schaner u mars? Schaner
- Pli gugent avair 30 onns u 70? 70 onns
- Flims u Laax? Ni l'in ni l'auter. Quai è per mai ina regiun.
«50:50» – il videocast communabel da Somedia e RTR
Somedia e Radiotelevisiun Svizra Rumantscha RTR porschan cun il format da talk «50:50» in nov product communabel. Il videocast vul promover mintga mais discurs approfundads cun exponentas ed exponents da l'economia, da la politica e da la societad.
Pertge il num «50:50»?
- Equiliber e diversitad: il num dal videocast accentuescha las stentas da preschentar ina selecziun da giasts equilibrada e diversa per represchentar ina vasta paletta da chaus e persunalitads.
- Simplicitad e clerezza: In num simpel e chapibel sco «50:50» associescha directamain l'idea fundamentala dal podcast, senza stuair declerar bler dapli.
- Simbol da fairness: La relaziun da 50:50 vegn duvrada savens sco simbol per fairness ed egualitad – quai che correspunda bain er a las finamiras dal podcast.
Gast in der Sendung «50:50» ist Reto Gurtner, Verwaltungsratspräsident und Delegierter der Weisse Arena Gruppe. Im Gespräch mit der RSO-Moderatorin Katharina Balzer und dem RTR-Moderator Andri Franziscus verrät Gurtner etwa, wieso er davon überzeugt ist, weshalb das Skifahren heute viel zu günstig ist.