Star sin il palc, divertir cun chant a capella e bler bun umor sursilvan. Quai èn stadas las qualitads dals commembers dals Acabellos sur prest dus decennis. La furmaziun a capella da la Cadi ha decidì da terminar lur carriera per immediat.
En ils passa 18 onns hai dà differentas midadas tar ils chantadurs. Il success è dentant stà constant. Salas plainas e concerts supplementars era normal tar ils Acabellos.
Igl è sta in fitg bel temp. Nus avain chantà, ris e magari era tremblà ensemen sin tribuna – quai che resta uss è l’amicizia.
Passa 18 onns ha la furmaziun a capella da la Cadi procurà per salas plainas e fatschas cuntentas. Els èn stads buns da dar a chanzuns da furmaziuns da renum internaziunal nov schlantsch cun bler umor grazia a lur texts rumantschs.
Noss recept da success è per franc noss umor. Per amur dal divertiment han magari ils tuns lura patì.
Era tar il public da RTR èn chanzuns sco «jeu sun in sursilvan», «Na, Na, Na» u era «Viver cun Tei» adina puspè vegnidas giavischadas en las gratulaziuns e tar il concert sin giavisch da la dumengia.
Sco tar tut la scena da cultura, ha era la furmaziun Acabellos patì durant il temp da pandemia. Pli paucas emprovas, pli paucas preschentaziuns e maldispostadads entaifer la gruppa han manà tar la decisiun. Damian Deflorin, Andri Hendry, Roman Venzin, Geni Monn, René Cavegn, Giochen Monn, Daniel Maissen e lur tecnicist Daniel Duff:
Adia, engraziel per las bellas uras ed a revair!
Or da l'archiv:
