Avair ina buna rait da contacts saja ina da las pli impurtantas chaussas per adina puspè survegnir lavur en la branscha da film e teater, di tranter auter l’actura e reschissura grischuna Felicitas Heyerick (38). Ella inscenescha per il mument il nov toc sin la Klibühni «Die Götter von Silicon Valley». Las acturas ed ils acturs che giogan en quest toc pon be suttastritgar quai.
In producent da Los Angeles ha ina giada ditg a mai: «Ti dovras amis, amis, amis – e forsa in zichel talent».
Cunzunt en il mund da film giaja bler u sur in’agentura, u ch’insatgi auter proponia ina actura u in actur a la reschia. Be avair in bun portfolio insanua sin ina pagina d'internet na dettia betg lavur, di Alessia Toutsch (20), ina giuvna actura da l’Engiadina.
Quellas rollas en films u teaters che jau hai fatg enfin uss hai jau be survegnì, perquai ch’insatgi ha enconuschì mai d’in auter project e lura contactà mai per in nov project.
Uschia ha ella era survegnì quella rolla en il teater tras la reschissura Felicitas Heyerick. Ellas han giugà ensemen tar in film curt ed uss ha Heyerick dumandà la giuvna actura, sch’ella veglia giugar en ses nov project.
Tar il teater saja la differenza simplamain ch’ins na saja betg dependent ch’insatgi auter propona ins tar la reschia u producziun – ubain ch’i dettia plitost in pool da persunas che lavuran ensemen. E sche la collavuraziun gartegia, dumondian ins adina puspè in l’auter per far part en projects.
Ir a DIESCH castings – survegnir INA rolla
Ina buna rait ed in'agentura èn schon ina giada bunas premissas per almain vegnir envidà a castings. In invit ad in casting na muntia dentant betg ch'ins survegn era ina rolla, quai san er ils acturs Alexander Albrecht (37), ch’è creschì si mez a Turitg e mez a San Murezzan, e Curdin Caviezel (29) da Flond en la Surselva.
Ti vas tar diesch castings e survegns forsa ina giada ina rolla. En il teater è la quota meglra tar mai.
E la finala dovri er blera atgna iniziativa, din las quatter acturas ed acturs. Far sez projects gidia er da rimnar experientscha e far novs contacts.
«Die Götter von Silicon Valley» – il nov toc sin la Klibühni
En l’adattaziun grischuna dal toc «Die Götter von Silicon Valley» – da l’autur iranais William Alan McNeice – accumpognan las aspectaturas ed ils aspectaturs quatter persunas. Ellas han surprendì in'incumbensa da l’uffizi da protecziun civila da Cuira da far in teater per sensibilisar la populaziun che Cuira è ina regiun periclitada da terratrembels, declera Felicitas Heyerick. Resumà curt vai en il toc per in programmader ch'ha creà ina app che mussa cura ch’i dat in proxim terratrembel. Quella app mussa lura ch'i dat en gnanc in'ura in grond terratrembel exact là nua ch'els èn. En quest temp enfin la catastrofa han las figuras da sa dumandar sch'els duain salvar ils carstgauns u plitost far fatschenta cun quella app.
Tge exact che la morala da quest toc umoristic è duai dentant mintga aspectatura ed aspectatur chattar ora per sa sez. Tant tradescha la reschissura dentant:
Ins na po prender nagut en fossa. Cura che nus murin stuain nus laschar qua tut – la carriera, ils raps.
In ensemble internaziunal
Trais da las quatter acturas ed acturs giogan il bler sin tribunas internaziunalas sco Londra, Berlin e Vienna u han fatg part tar ina producziun americana da Netflix. La giuvna ha dentant pir avant in onn finì la scola d’acturas a Turitg – tschels han schon avant radund diesch onns prendì encunter il diplom.
Cun il temp avran ins il truchet ed ha ina tscherta rutina. Ella tschenta dumondas u fa inqual chaussas auter e quai inspirescha er nus da puspè vegnir or da noss muster.
Dad ina tala constellaziun tranter rutinads e novizs possian tuttas e tuts profitar, di Felicitas Heyerick. Entant ch’ella possia emprender fitg bler da tschels portia ella nov schlantsch en la gruppa.