Siglir tar il cuntegn

Header

audio
Philipp Gurt cun ses nov cudesch «Bündner Blutmond»
Or da Actualitad dals 29.03.2024. Maletg: Philipp Gurt / CC BY-SA 4.0
laschar ir. Durada: 3 minutas 21 Secundas.
cuntegn

Bündner Blutmond In nov crimi da l'autur da Cuira Philipp Gurt

«Bündner Blutmond» è in nov cas per l'investigadra Giulia de Medici. Philipp Gurt raquinta dal process da scriver e da ses nov crimi.

Il nov crimi da Philipp Gurt «Bündner Blutmond – in cas per Giulia de Medici» tracta d'ina giuvna che vegn rapinada. L'investigadra Giulia de Medici da Cuira emprova da gidar la giuvna e da schliar il cas.

«Bünder Blutmond» è gia il 14avel crimi da Philipp Gurt ed il 7avel cas per la figura Giulia de Medici. L’autur ha ina gronda fascinaziun cun il gener da crimi. Il pli gugent ha el la tensiun tar in crimi.

Mes slogan è: la vita è memia curta per cudeschs lungurus.
Autur: Philipp Gurt Autur

El è er enconuschent per auters cudeschs pli serius, per exempel per sia autobiografia «Schattenkind». Ma era ses crimis han parts autobiograficas. In bun exempel è in da ses emprims crimis ch’el ha scrit: «Bündnerfleisch». Là raquinta el da la scena da drogas e da giuvenils negligids.

Process da scriver

Philipp Gurt prenda cun el sias lecturas e ses lecturs en il mund da cas criminals e da lavur da detectivs. Per el saja il svilup da las istorgias exact uschè surprendent sco per sias lecturas e ses lecturs, di el envers SRF. El scriva numnadamain sias istorgias senza ch'el las ha planisà a fin. En quest connex midia el savens l'assassin u fetschia umens da dunnas.

Jau hai savens gia midà l'assassin, 5, 6, 7 giadas – la figura è sa sviluppada independentamain.
Autur: Philipp Gurt Autur

Quai haja in grond avantatg decisiv, di l'autur. Uschia na pon sias lecturas e ses lecturs numnadamain betg vegnir sin ils fastizs ad el, perquai ch'el na metta insumma nagins fastizs.

Philipp Gurt lascha bleras libertads a sias figuras. Tge ch'el lascha dentant adina medem è il lieu nua che ses crimis giogan. Sias istorgias giogan numnadamain adina en il Grischun, en sia patria. Sias istorgias han lieu per exempel sin la Muntogna da Schons, en l'Engiadina, a Cuira. El descriva il Grischun sco lieu cun nundumbraivlas plazzas da giugar e cuntradas da bellezza.

En tge lieus en il Grischun che quai porta Giulia de Medici en il nov crimi, na tradescha el sa chapescha betg en l’intervista. Per lez pon ins leger ses nov cudesch e chattar sez la resposta.

RTR actualitad 11:00

Artitgels legids il pli savens