Legenda:
Illustraziun: RTR, Jon Bischoff
L’istorgia fiss stada memia bella: In Grischun, gea perfin in Rumantsch, maina durant 16 onns cun success la Banca Raiffeisen. Entant che UBS, CS e cumpagnia bella ruinan lur num, daventa Pierin Vincenz il «signur perfect», il banker ultra-schuber, cun ina bella gloriola sur il chau. Or da la pitschna banca cooperativa Raiffeisen fa el il terz grond institut bancar en Svizra. Il favrer 2018 però, trais onns suenter sia pensiun, sa tschenta Vincenz en praschun. Arrest d’inquisiziun. Ha il banker iper-correct fatg deals zuppads per l’atgna bursa? Sin donn e cust da «sia» Banca Raiffeisen? Dad in mument a l’auter para Pierin Vincenz dad esser in sco divers auters: in banker cun cornas.
