Nus avain fatg egliuns! Tenor ina retschertga è il Radio Rumantsch il radio il pli simpatic da l’entira Svizra.
Per l’emprima giada insumma è RTR vegnì resguardà en questa retschertga realisada onn per onn da l’interpresa Publicom. E la surpraisa è lura stada tant pli gronda cura che nus avain udì l’avust passà ch’il Radio Rumantsch è a la testa da la rangaziun. Ma tge signifitga quest titel? Ed è quai insumma desiderabel per ina chasa da medias dad esser «la pli simpatica»?
Ins pudess esser da l’opiniun che glieud simpatica na provochescha betg, n’irritescha betg e n’ha era betg pizs e chantuns – curt, che tala glieud è simplamain gentila cun tuttas e tuts. Gist chasas da medias, u meglier ditg schurnalistas e schurnalists, duessan però esser critics, stuessan mintgatant provocar ed irritar ed esser uschenumnads mordaventrigls. Simpatia sco attribut neutral, superfizial e «pulit»?
Simpatia è en emprima lingia in sentiment, ina affecziun spontana. Insatgi è simpatic – u apunta betg. Savens tanschan paucas secundas, in’emprima impressiun, ed il sentiment da simpatia è avant maun – u er betg. Simpatia s’accordescha savens cun ina tscherta intimitad ed ina tscherta attracziun. E gist questa intimitad envers in brand u ina marca e la relaziun cun il public vegn a daventar en il futur – en spezial en il mund da las medias – anc pli indispensabla ed existenziala. A tgi pon ins anc crair? Tgi è fidabel? Tgi di la vardad? Quai èn las dumondas centralas dal futur.
En quest senn: grazia per las fluras! Nus essan gugent simpatics. Sche quai è pervia da noss linguatg ubain pervia da nossa moda e maniera autentica e noss scharm muntagnard – jau na sai betg. En mintga cas vegnin nus speranza a restar uschia. Cunzunt vegnin nus dentant a restar fidaivels a nossas valurs e lavurar vinavant tenor noss princips: accuratezza, multifariadad ed independenza. Sulettamain uschia po RTR era restar en il futur credibel e relevant.
A propos credibladad: En quest ranking ha RTR cuntanschì il segund plaz. RTR – simpatic e credibel. Questa cumbinaziun ma plascha anc bler meglier.
