En tschertga da la masculinitad
Far ora laina, struvegiar enturn vi d'ina moto e lura suenter far sitg il pop ed anc far in zic chaltschiel?
Ozendi è tut pussaivel. Per fortuna!
La rolla da l'um è numnadamain sa midada. E tuttina èn blers pregiudizis cunter ils umens magari persistents. Buobs na bragian betg! In um en rosa, curius! Purtar lac dad unglas – insatge per dunnas.
Nossa societad, e nus umens, patin ferm sut las normas masculinas. Quai san ins numnar ina epidemia che nus stuain surmuntar!
Ma co midar quai? Suenter che jau sun daventà bab d’in segund figl hai jau ma fatschentà cun exact quellas dumondas. Co midar quai? Tge valurs èn impurtantas e ston vegnir dadas vinavant a la proxima generaziun? Tge è la rolla da l'um en nossa societad? Per respunder quai hai jau ma scuntrà cun trais umens fitg differents.
Gea, jau correspund probablamain al purtret ch’ins ha ozendi en la societad d’in um. In um viril cun bleras musclas. Ma fuck, jau hai era fatg insatge per quai.
L’um en la crisa
Pli baud eri anc cler – l'um va a lavurar e la dunna guarda da la chasada e da la famiglia. Ozendi sa maschaidan questas rollas adina pli fitg. L'um ha uschè savens dad accumplir pliras rollan en ina. La crisa dals umens sa dentant era esser ina schanza. Ina schanza per in midament e per chattar ina nova, meglra posiziun en la societad.
La dunna ha gea era pliras rollas ... pertge duessan lura ils umens betg dumagnar quai?
L'endretg um na datti betg!
Suenter blers discurs e cun peda da reflectar sun jau vegnì a la conclusiun ch'i dat duas chaussas impurtantas. Prima: Il pensar en alv e nair, masculin e feminin, na gida nagin. Sche nus chalain da categorisar tut, pudain nus tuts viver pli liber. E segunda: I fa fitg bain da tematisar e discutar la rolla da l'um. Uschia pudain nus chattar e celebrar las bleras fassettas da mintgin. Ed a la fin gida quai a mintgina e mintgin. Ma oravant tut als umens sezs.
