Carlo Portner è mort mesemna en la vegliadetgna da 72 onns suenter greva malsogna. L'anteriur deputà da la PCD è stà divers onns president communal da sia vischnanca da domicil Haldenstein. Creschì si è Portner a Domat, el aveva perquai ina ferma colliaziun cun il rumantsch.
20 onns president da la cumissiun da cultura
Carlo Portner è stà passa 20 onns president da la cumissiun da cultura dal chantun Grischun. Fin la stad passada è el stà parsura da la fundaziun dal teater da Cuira ed d’autras fundaziuns sco per exempel Benevol u la fundaziun Duri Sialm.
Sper quai engaschi sin il sectur cultural è l'advocat da Haldenstein er stà durant plirs onns manader da fatschenta da la Societad grischuna da dentists e da l’Uniun grischuna da medis.
RR novitads 09:00