Avant bunamain 10 onns han ins schluppettà l’urs M13 en Val Puschlav. La preschientscha da l'animal da rapina aveva ils mais precedents chaschunà per charplinas e foss profunds a l’intern da la communitad. Medias naziunalas ed internaziunalas han rapportà dal cas M13 e da las cuntraversas en Val Puschlav.
Il reschissur Alessandro Abba Legnazzi documentescha en ses film ils eveniments da quella giada. A maun da tschintg persunas che raquintan da lur temas, ravgias ma era da lur fascinaziun per l’urs, reflectescha l’istorgia la convivenza spinusa da l’uman cun animals da rapina sco er las consequenzas ed implicaziuns che quai ha per ina cuminanza.
Cun Livio, Arturo, Daniele, Flavio ed Annalisa – ina part dad els interpretescha en il film sez lur rolla da quella giada – essan nus perditgas da lur inscunters cun l’urs e da lur stentas da far frunt ad ina situaziun nova e straordinaria.
Premiera a Puschlav
Cun gronda tensiun han var 150 aspectaturas ed aspectaturs guardà la premiera dal film «L’ors» dal reschissur Alessandro Abba Legnazzi. Il film ha puspè sveglià las emoziuns da quel temp che M13 ha procurà durant sia preschientscha en la Val Puschlav.
Per bleras abitantas ed abitants ha el procurà per chaus cotschens e per part era fatg tema. Oravant tut las medias naziunalas ed internaziunalas han dà fitg blera attenziun a l’urs.
In quel film è l’urs vegnì giugà dad ina persuna cun ina mascra ed uschè ha era el gì la pussaivladad da communitgar, schizunt era sur facebook. Per la populaziun preschenta ha quest film sveglià emoziuns e purtà bleras regurdientschas, sco che quest temp intensiv ha gì lieu durant la visita en il Puschlav. Blers dad els pon anc raquintar istorgias che han gì lieu lezza giada, per part schizunt inscuntrà l’urs sin via.
A blers ha l'urs fatg tema, per auters era el ina fascinaziun. Per ellas ed els da la Val Puschlav è quest film in document impurtant che raquinta l’istorgia d’avant 10 onns e dat in sguard era or da l’optica da l’urs sez.
Finalmain han ils guardiaselvaschinas sajettà ils 19 da favrer 2013 l’urs ed uschia è ì a fin in temp intensiv e precar en il Puschlav.
Ils Cuntrasts mussan il film en duas parts – ils 30 d'october ed ils 6 da november: