Theresa Ecoffey ha preschentà il servetsch da Grischun Vacanzas ch’examinescha sin giavisch la preschentaziun electronica dals museums. Grischun Vacanzas porscha quest servetsch en general a la branscha turistica, ma er als museums grischuns. Il test custa 150 francs.
La spezialista digitala ha era menziunà las novas prescripziuns da la protecziun da datas che saja detg cumplexa e che stoppia vegnir ademplida. Ulteriurs aspects èn stads las sfidas cun las maschinas da tschertgar, e la preschientscha optica da las paginas d’internet.
Sin la dumonda da Theresa Ecoffey sch’ils museums vendian entradas online, èsi sa mussà che differents dals museums ed archivs culturals na porschan anc betg questa pussaivladad. Tenor la spezialista saja questa spierta ozendi indispensabla.
Midadas al timun
Andreas Leisinger ha manà per la davosa giada la radunanza generala da Museums Grischuns. El ha surdà la sonda passada la batgetta a sia successura Chantal Störmer. En la suprastanza hai dà diversas midadas – e la radunanza ha elegì da nov en quest gremi Katharina Beisiegel dal Museum Kirchner da Tavau, Thedi Gut da la Stamparia Strada e Nicola Castelletti dal Museo Moesano.
