Siglir tar il cuntegn

Header

video
Premi Term Bel 2018 survegn Asa S. Hendry
Or da Actualitad dals 04.11.2018.
laschar ir. Durada: 2 minutas 25 Secundas.
cuntegn

Dis da litteratura 2018 Ils Dis da Litteratura 2018 èn a fin

Ils 28avels Dis da litteratura èn ids a fin la dumengia suentermezdi cun la premiaziun da la victura dal Premi Term Bel 2018. Quel va, suenter il 2016, danovamain ad Asa S. Hendry per ses text «Binaris».

Asa S. Hendry ha survegnì il Premi Term Bel 2018 per ses text «Binaris» che tracta l’adolescenza prematura dad ina giuvna.

En sia laudatio per il text di la giuria:

Persvadì la giuria han las differentas stresas da purtrets, sentiments e relaziuns. Ellas dattan al text ina profunditad, spessadad ed avertezza. Medemamain persvadì ha l’experimentaziun gartegiada en lingua e metafras.
Autur: B.Giossi, C. Josty e R. Valär giuria Premi Term Bel 2018
audio
Asa S. Hendry legia ses text «Binaris»
ord Actualitad dals 04.11.2018.
laschar ir. Durada: 6 minutas 27 Secundas.

Premi Term Bel 2018 – cun in nov modus

Il Premi Term Bel ha lieu mintga dus onns als Dis da litteratura a Domat. Quest onn ha midà il modus dal premi: Ils tschintg texts en la concurrenza finala n’èn betg vegnids prelegids da las auturas ed ils auturs mabain da l’actura Marietta Jemmi.

Pir dumengia suentermezdi è il public vegnì a savair tgi che sa zuppa davos ils tschintg texts. Ils finalists 2018 eran: «Curriculum» da Walter Roselli, «Quel di» da Tinetta Rauch, «Binaris» dad Asa S. Hendry, «Viadi i’l paradis» da Fadrina Hoffmann e «La curridura» da Viola Pfeiffer.

Las trais dunnas.
Legenda: Trais da tschintg auturas da la concurrenza finala: Tinetta Rauch, Viola Pfeiffer ed Asa S. Hendry. RTR

Mintga finalista e finalist ha survegnì 700 francs. Il premi dal public, dotà cun 1500 francs, va quest onn a Viola Pfeiffer ed il text «La curridura». Tut ils premis, inclusivamain il Premi Term Bel (3000.-) èn sponsurisads da la vischnanca burgaisa da Domat, ch'ha uschia redublà quest onn la summa dals premis.

Domat, il punct da cristallisaziun per la litteratura rumantscha

Er quest onn han divers auturs e chasas edituras publitgà lur ovras novas sin ils Dis da litteratura:

  • Benedetto Vigne ha preschentà cun «Ils ventganov da settember» ses «primroman», in’istorgia apparentamain criminala plain fintas e fastizs faus.
  • La victura dal Premi Term Bel, Asa S. Hendry, è vegnida a Domat cun il cudesch «Sin lautget» che raquinta d’in’amicizia nunusitada tranter ina dunna giuvna ed in’autur che va vers ils quaranta.
  • Premiera a Domat ha gì er il cudesch d’uffants «La cigna», ina veglia paraula sursilvana raquintada da nov da Gabriela Holderegger Pajarola ed illustrada da Jacinta Candinas.

video
«Sin il viv» dals 04-11-2018 Domat
Or da Giuventetgna dals 04.11.2018.
laschar ir. Durada: 58 minutas 57 Secundas.

Success litterar e culinaric

In dals punct culminants era quest onn la tschaina da gala «Daletgs tranter lingias» da sonda saira.

Accumpagnà da schuppa, past principal, dessert e digestiv, servids en sala, han il clown Roberto Chiriatti, il musicist Simon Benz e la ballarina Seraina Siedler-Tall, il cabarettist Flurin Caviezel e la chantadura Sara-Bigna Janett, la chanzuniera Astrid Alexandre e la sautunza Riikka Läser procurà per intermezzos poetics, tuns lirics ed istorgias divertentas.

Dapli public ch'il 2017

Ils organisaturs tiran ina bilantscha positiva da questa 28avla ediziun dals Dis da litteratura. Cun totalmain radund 400 entradas durant l’entira fin d’emna ha l’ediziun dals Dis da litteratura attratg dapli public che l’onn passà.

D’attribuir è quai tenor las organisaturas tranter auter a la concurrenza litterara Premi Term Bel. Ed era la gestiun e la disciplina dal temp, ina sfida cun 20 puncts da program, ha funcziunà quest onn en favur dal public.

Ils 29avels Dis da litteratura han lieu dal 1. fin ils 3 da november 2019.

audio
Bunura: Revue dals dis da litteratura
ord Actualitad dals 05.11.2018.
laschar ir. Durada: 4 minutas 16 Secundas.

RR actualitad 06:00++

Artitgels legids il pli savens