Dis da litteratura 2024 - Quai èn stads ils Dis da litteratura 2024

Impressiuns dals Dis da litteratura 2024

La 33avla ediziun dals Dis da litteratura ha cumenzà cun in’empermissiun: Manuela Balett, presidenta da l’Uniun per la litteratura rumantscha, ha annunzià gia la sonda ils Dis da litteratura 2025 e quai puspè durant l’emprima fin d’emna da november. Be tgi che organisescha els n'è anc adina betg cler u communitgà. Il comité d’organisaziun ha annunzià avant in pèr emnas sia demissiun en globo, e l’avegnir dals Dis da litteratura pareva da star sin la cupitga.

Che questa 33avla ediziun dura be dus dis empè da trais sco usità ha da far cun la Numnasontga - qua restan a Domat las portas serradas. Ma forsa è quest di da festa vegnì encunter al comité d’organisaziun che ha mess en chomma il program da quest onn cun persunal reducì – be en quatter empè dad en tschintg u dapli – e cun adina damain daners dal maun public e da fundaziuns che sustegnan occurrenzas culturalas.

Tut las prelecziuns ed eveniments

Preschentaziun da 9 publicaziuns

Sin la producziun da cudeschs rumantschs na para quai percunter betg d’avair in effect: 9 publicaziuns rumantschas novas èn vegnidas preschentadas durant quests dus dis a Domat. Dal cudesch da poesias al roman, da texts satirics a la paraula, da la traducziun cumplexa al text scientific. La scena da litteratura rumantscha è viscla quai che pertutga geners e formats da texts, scrit vegna en tut ils idioms ed en rumantsch grischun, dad umens (actualmain en tendenza pli vegls) e da dunnas (actualmain en tendenza pli giuvnas).

Qua pudais anc ina giada leger tut en detagl:

Prelecziuns per il Premi Term Bel

In dals puncts culminants dal di è stada la prelecziun e discussiun dals quatter texts finals dal Premi Term Bel. Era qua è sa mussà il grond spectrum d’acces e da differentas modas da lavur cun la lingua rumantscha en texts litterars. Ed oravant tut che ina tala concurrenza da litteratura animescha ed intimescha tant ad auturas arrivadas sco era ad auturs che fan emprims pass da producir texts cun potenzial litterar. E precis da quai dovra per promover e mantegnair ina scena da litteratura rumantscha viva e sgiagliada. 

E quai è bain ina raschun per ballar, e quai ha fatg il public fidel dals Dis da litteratura che ha emplenì la sonda da la damaun enfin la saira la sala Tircal a Domat – tar ils sounds da La Pascal Gamboni Combo Crassira cun Dario Hess ed in'apparientscha da surpraisa dal performer Luis Coray.

Quai èn las victuras ed ils victurs dal Premi Term Bel 2010-2022

E quest onn va il Premi Term Bel 2024 sco era il premi dal public a Janic Maskos da Scuol che gudogna cun ses text «Cour'es quaint». Il premi Term Bel vegn sponsurà da la vischnanca burgaisa Domat ed è dotà cun 3'000 francs, il premi dal public è dotà cun 1'500 francs. «Cun meds simpels e reducids gartegia in text atmosferic da gronda qualitad – curt e bun», uschia è il fazit da la giuria.