La bartga stat in zic sco simbol per quest temp da corona, nua ch'ins po dir che tuts sa chattan sin la medema bartga. In temp ch'ha laschà enavos fastizs tar mintgin.
Per l’emissiun han las duas moderaturas Corina Schmed (RTR) e Clarissa Tami (RSI) ed ils dus moderaturs Sven Epiney (SRF) e Jean Marc Richard (RTS) perquai visità persunas en las differentas regiuns da la Svizra. Persunas che raquintan da lur sfidas durant il temp da corona, persunas ch'han muventà insatge quest temp.
Corina Schmed è tranter auter s'inscuntrada cun l'intendant dal Festival Origen, Giovanni Netzer, sin ina da las pli autas tribunas sur mar en l'Europa.
Plinavant è ella stada en la Val Madris, ina val laterala en la Val d'Avras, ch'ha strusch sentì insatge da corona e dal lockdown. Là ha ella inscuntrà trais dunnas che fan cun passiun lur lavur sco pura, pastura e signuna.
Quatter prominents mussan lur lieus da forza
Da la partida sin la bartga èn er quatter prominentas e prominents da las differentas regiuns svizras. Cun els en las moderaturas ed ils moderaturs stads en lur lieus preferids, lieus ch'han dà forza ils ultims mais. Corina Schmed è per exempel stada cun il campiun mundial ed olimpic Nino Schurter cun il bike sin il Mittenberg sur Cuira. Il Sursilvan fiss uss atgnamain a Tokio per defender il titel da campiun olimpic. Uschia er la curridra da sprint Mujinga Kambundji.
Ils prominents ch'èn da la partida sin la batga:
- Alain Berset; cusseglier federal
- Nino Schurter; campiun olimpic e mundial da mountainbike
- Daniele Finzi Pasca; autur e reschissur da teater
- Mujinga Kambundji; curridra da sprint
Tras l'emissiun accumpognan er quatter bands da las differentas regiuns linguisticas.
- Da Lombris
- Gions' Tears
- Adrian Stern
- Chiara Dubey
