Marcus e Claudia Derungs dad Uors han in siemi: Els vulan ir a habitar en in bus cun lur famiglia. Quai vul dir: bandunar lur abitaziun da 4,5 stanzas cun 120 m² ed ir el bus a star, ch'ha be pli 6,8 m² spazi da viver. Naschida è questa idea da viver ina furma alternativa gia cun la naschientscha da l'emprim uffant. Ma silsuenter ha quai tuttina anc cuzzà in per onns, fin che la famiglia è lura stada madira per propi far quest pass. Il motiv principal per far il pass ora da l'abitaziun en el bus è stà, che Marcus e Claudia Derungs vulan educar lur uffants liber e betg en scola. Tras quai sa dattan autras furmas da viver.
Tge dovr'jau insumma? Nus avain bler memia bler chaussas. Il surchombras era plain. Ma nus avain badà che nus gnanc duvrain tut quai. E quai pudain nus era dar vinavant a noss uffants, quai che fa plaschair a nus.
Uschia han els gia cumenzà baud da s'organisar, da cumprar il bus, bajegiar enturn quel. Da sortir ora chaussas e dar vinavant tut quai che na vegn betg pli duvrà. Pertge en il bus vivan ins ina vita reducida. I ha be plaz per il minimum chaussas. La fin finala èn vegnids cun en il bus p. ex. be tschintg tagliors e la pusada vitiers. Era la sgrattirola è be ina pitschna.
Abitar, ma betg emigrar
L'idea è en emprima lingia d'abitar en il bus. E lura pir en in segund pass, cura ch'il temp è madir, ir sin viadi. Quai per bun trais mais, e lura puspè turnar. Pertge? Perquai ch'il bab Marcus Derungs ha ina fatschenta e sto lavurar.
Romantic m'imaginesch jau lura, cura ch'ils uffants dorman e nus essan insanua en Svezia sper in bel lai.
Suenter in per incaps e reparaturas è il Sapi, co il bus ha num, entant pront. Mez zercladur 2022 sa metta la famiglia sin via cun il bus, sco emprim en l'Austria, suenter en la Frantscha e Germania. E tgi sa, forsa maina lur viadi els perfin fin en Svezia, lur pajais da siemi.