Siglir tar il cuntegn

Gian Rupf «Ein Waldstück» – in toc en il guaud cun il guaud

Igl è l'emprim agen toc da l'actur Grischun Gian Rupf che vegn sin il palc. Ma lez n'è betg en ina stanza classica sco quai ch'ins pudess pensar mabain en il guaud. Il guaud è stà lieu d'inspiraziun ed è era lieu d'acziun.

Igl ha gist pluvì, ma plansieu cuchegia il sulegl puspè tras ils nivels e las plantas a Lantsch en in guaud davos l'arena da biatlon Roland. Ed ils dus musicists Christian Zehnder ed Astrid Alexandre sco l'autura Nicole Knuth e l'iniziant ed autur Gian Rupf èn sa radunads en il guaud per mussar ad RTR in schatg dal toc «Ein Waldstück», avant ch'i va liber cun la prova generala la saira da la gievgia, 20-06-2024.

Ils musicists sunan sin grondas flautas, Christian Zehnder imitescha ramurs da tschiervs che berglan, entant che Astrid Alexandre chanta levs tuns vitiers. Nicole Knuth prelegia il text: ‹Hören Sie mir zu?›, ‹Was hörst du, wenn du zuhörst?›, ‹Erinnerst du dich an das Geräusch vor dieser Frage?›. Vinavant vai cun: ‹Busch erwacht, und Baum, Blätter in den Wald, diese Ruh!› che Gian Rupf prelegia. El porta uschia il public frasa per frasa pli profund en in guaud d'imaginaziun.

Ed adina era da la partida: Tut las plantas dal guaud. Ellas na discurran betg, ellas èn statistas, pudess ins pensar l'emprim mument. Ma a la fin dal toc surprendan ellas la rolla principala, ils musicists ed acturs vegnan adina pli da bass e laschan spazi a las plantas. Scrit il toc ha l'autura engiadinaisa Romana Ganzoni.

video
«Ein Waldstück» – in toc en il guaud cun il guaud
Or da Telesguard dals 21.06.2024.
laschar ir. Durada: 2 minutas 44 Secundas.

Unplugged

Tut vegn preschentà a moda fitg simpla – senza glisch, senza amplificaturs e senza tribuna. Il guaud è avunda culissa per quest toc e tut ensemen duai dar ina preschentaziun aventurusa per l'aspectatura ed aspectatur. Per els van ils organisaturs numnadamain cun in bus ed ils ultims 500 meters ston els ir a pe. Curt avant il lieu da teater survegnan els ina cuverta ed ina lampa da militar per chattar enavos la via suenter la preschentaziun ch'ha lieu la saira mintgamai a las 20:00. Ina glisch pudess era il handy dar, ma ils organisaturs giavischan sapientivamain da laschar quel en il modus silent u perfin da serrar giu diltut. I duess dar in viadi en il guaud senza distracziuns, pertge en quest mund dettia quai gia avunda influenzas, gist cun il telefonin. Ed uschia duai era vegnir gudì il toc en la ruassaivladad dal guaud che cuzza in'ura e che vegn preschentà en trais acts.

Organisà vegn l'eveniment ensemen cun il Parc Ela. Las diesch occurenzas han era lieu en cas da plievgia, per ina alternativa sut tetg è mintgamai procurà. Ils plazs èn limitads a 35 persunas per occurenza, l'entrada custa 35 francs.

Telesguard dals 21-06-2024

Artitgels legids il pli savens