La glista dals auturs e da las auturas preschentas questa fin d’emna sin il palc da la Halla Tircal a Domat sa lascha vesair – quest onn eran quai tranter auter Gianna Olinda Cadonau, Arno Camenisch, Göri Klainguti, Tim Krohn, Arnold Spescha, Leo Tuor, Bendetto Vigne e divers auters. Els han prelegì or da lur publicaziuns, ma els han era discutà davart il scriver, la genesa da lur texts e la critica da quels.
Radund 300 persunas
Ils organisaturs tiran ina bilantscha positiva da questa 26avla ediziun dals Dis da litteratura. Tenor Maurus Candrian, commember dal comité d’organisaziun, haja l’idea dad envidar nums bain enconuschents en la scena litterara gì in bun effect sin la cifra da visitaders. Cun totalmain radund 300 entradas durant l’entira fin d’emna ha era quest’ediziun dals Dis da litteratura attratg in public cumparegliabel ad auters onns.
Stina Hendry gudogna il Premi Term Bel
Sala plaina aveva la sonda suentermezdi er in dals puncts culminants dals Dis da litteratura, la concurrenza litterara Premi Term Bel. Gudagnà quel premi ha quest onn la giuvna gimnasiasta Stina Hendry da Vella. Ella ha persvas la giuria cun ses text «Davos baselgia», in’istorgia davart in’amur che va a finir.
Il premi dal public va medemamain a la giuvna Lumneziana da 17 onns. Il Premi Term Bel, sponsurà da la vischnanca burgaisa da Domat, è dotà cun 1’000 francs, quel dal public cun 500 francs. Stina Hendry ha gia publitgà l'onn passà - ensemen cun sia collega Flurina Albin - il cudesch da fantasy «Emalio».
Vernissaschas en divers idioms
Trais differentas publicaziuns han gì lur vernissascha als Dis da litteratura. Uschia ha l’Engiadinaisa Gianna Olinda Cadonau preschentà sia emprima collecziun da poesias «Ultim’ura da la not / Letzte Stunde der Nacht».
Il Surmiran Benedetto Vigne ha prelegì per l’emprima giada ils «haikus» or da ses «Diari Giapunais». Ed il Sursilvan Leo Tuor ha pudì preschentar l’emprima giada ad in publicum ils trais discs cumpacts cun texts rimnads sut il titel «ll spért e la val / Der Geist und das Tal».
RR actualitad radio