Siglir tar il cuntegn
cuntegn

Cultura Il sautunz tranter dissegn e colur

Ils 10 da favrer festivescha Constant Könz ses 90avel anniversari. L’artist da Zuoz era decennis a la lunga in dals pli activs artists en il Grischun.

Constant Könz.
Legenda: Constant Könz. ANR, B. Stecher

Constant Könz ha stgaffì ina vasta ovra da maletgs en ieli e da sgrafits vi da chasas, dentant er embellì edifizis publics cun picturas muralas: chasas da scola, centralas electricas u bogns publics.

Tranter l’ovra da Könz sa chattan er blers maletgs cun in connex religius – betg per cas: L’artist ch’è sa fatschentà intensivamain cun l’antroposofia, accentuescha adina puspè che la cretta gioga ina rolla impurtanta en sia vita.

Enconuschent è l’artist cunzunt per ses fin sensori per colurs – colurs ch’èn plitost miaivlas che fraidas, plitost mediterranas che alpinas. Adina è il diever da colurs sapientiv e calculà. L’artist ha ina giada cumpareglià il dissegn sco «skelet» e la colur sco «musculatura». Per l’art dovria l’equiliber dad omadus.

Legenda: Guardar il video Visita en l'atelier da Constant Könz . Durada 05:40 minutas.
Or da Cuntrasts dals 26.10.2014.

Marcella Pult, autura d’ina monografia da l’artist, attesta che Könz pari «almain dad in punct da vista formal dad esser l’unic ertavel da l’amabla cumposiziun da colurs e da l’abstracziun plaschaivla dad Augusto Giacometti.»

La cumparaziun cun Giacometti è evidenta: Già d’uffant han las fanestras-baselgia da San Luzi a Zuoz, da las qualas duas èn picturadas da l’artist bregagliot, fascinà Könz. Mai avess il mat pensà da picturar sez, in pèr decennis pli tard, ulteriuras trais fanestras da la baselgia.

Legenda: Guardar il video Nova fanestra-baselgia per Zuoz. Durada 04:08 minutas.
Or da Telesguard dals 24.11.2010.

Legendar è er il lieu da vita e da lavur da Constant Könz. Anc oz viva el a Zuoz en la chasa resch melna che ses bab Iachen Ulrich aveva fabritgà per la famiglia. Ses atelier è cuntanschibel be tras ina clavatga da l’abitaziun nà.

En la monografia da Pult sa regorda l’artist Not Vital da ses inscunters cun Könz uschia: «Las istorgias che Constant raquintava eran uschè finas ch’ils pleds paraivan dad esser nivlas. (…) Tge mund agreabel. Tge grond e vast. Grazia che ti ma has avert ils egls.»

RR Vita e cretta