Nus raquintain l’istorgia da diversas persunas en ina vischnanca tipicamain rumantscha – da Surgonda. En il center stat la famiglia Caflisch: mamma Ernesta, bab Martin, figl Severin e figlia Pirmina. E tar ils Caflischs a Surgonda schabegia bler, fitg bler – la vita capita! P.ex. ha il tat dals Caflischs in infarct. La figlia Pirmina ha mal d’amur. E pertge sto l’onda Paula emigrar en Australia? Forsa pervi da sia affera zuppada cun Remo Casty, in um maridà da Surgonda? Tgi sa? Ed a Surgonda schabegia anc dapli: I dat in Volg che sto forsa serrar sias portas. I dat festas e disgrazias, temas e clichés, amur e dolur, speranzas e dischillusiuns, tschiel ed enfiern. Insumma: la «Vita capita» a Surgonda.
Legenda: Ernesta Caflisch. RTRErnesta Caflisch
Mamma. Naschida ils 19.07.1969. Creschida si a Surgonda. Lavura parzialmain en la chanzlia communala. Ha gì ina greva operaziun dals chantins. Chanta però tuttina en il Chor maschadà da Surgonda. Ernesta ha ina sora: Paula Farrèr.
Legenda: Pirmina Caflisch. RTRPirmina Caflisch
Figlia. Naschida ils 30.08.1996. Ha bels egls verds. Abita durant l'emna a St. Caterina e lavura en il Hotel Schweizerhof. Sia meglra amia è Marisa Demarmels.
Legenda: Severin Caflisch. RTRSeverin Caflisch
Figl. Naschì ils 18.11.1994. Vegn numnà «Sevi» da sia sora Pirmina. Lavura sin banca tar Remo Casty. Ha in Golf. Gioga en ses temp liber tar il Club da ballape Surgonda.
Legenda: Martin Caflisch. RTRMartin Caflisch
Bab. Naschì ils 26.04.1967. Lavura dapi blers onns en la scrinaria dad Alfons Battaglia Martin è chatschader e commember da la Societad da tir. El siemia anc savens dad ir davent da Surgonda, p.ex. en Canada, ses pajais da siemi.
Tat Bernard Caflisch
- naschì il 1936, vaiv
- Fimader e chatschader
- Tat Bernard patescha da demenza stat però a chasa cun ina tgirunza privata
Lucia dal Volg
- 51 onns, nubila
- Mamma da Marisa, ella ha tratg si suletta sia figlia
- Ha atgnamain num Lucia Demarmels, ma tuts la numnan «Lucia dal Volg»
- Lucia ha u ha gì in problem d’alcohol. È ussa ensemen cun Roland Battaglia, però quai è atgnamain secret
Marisa Demarmels
- Naschida il 1996
- Figlia da «Lucia dal Volg»
- Buna amia da Pirmina Caflisch, emprendista sin chanzlia communala
- Introvertida, magari era in zic nauscha e schigliusa
- Ha in vi e nà da relaziun cun Severin Caflisch
Paula Farrèr
- Naschida ils 08.12.1973, nubila, mamma dal pitschen Flurin
- La sora dad Ernesta Caflisch
- Era emigrada en Australia, lavura uss cun Pirmina en il Schweizerhof
- Aveva gì trais onns in’affera zuppada cun Remo Casty, alura ina relaziun cun in scolast da surf en l’Australia. È ussa ensemen cun l'ortoped Gabriel Schmid
Alfons Battaglia
- Naschì il 1957, maridà
- Schef da la scrinaria «Battaglia SA»
- Dapi 7 onns president communal
Remo Casty
- Naschì il 1967, bab da famiglia e divorzià
- Ha gì pliras afferas, tranter auter cun Paula Farrèr
- Manader da la banca e chatschader
Hans Gruber
- naschì il 1956, maridà cun Beatrice, bab da Marco
- Ha ina stizun da ferramenta e da rauba da chatscha
- Oriund dal Tirol dal Sid, discurra perquai cun accent tirolais
Ulteriuras persunas: Dr. Oscar Pedretti, l’ustiera Tina Zurbuchen, il droghist Duri Bachmann, l’ortoped Gabriel Schmid, la tgirunza polacca Olenka Wozniak e blers blers auters…
La vischnanca Surgonda
A Surgonda vivan var 800 persunas. La vischnanca ha ina scola primara e secundara, ina posta, ustarias, singuls hotels, baselgias ed ina stizun. La cuminanza vegn tgirada en diversas uniuns. Ina spezialitad da Surgonda: la vischnanca è a medem mument catolica e refurmada en ina – ha baselgias per omaduas confessiuns. In lieu da scuntrada è l'ustaria Crusch Alva. E là dat da discutar savens la fusiun previsa tranter Surgonda e la vischnanca vischina Saluorn.