Siglir tar il cuntegn

Header

audio
Prevista Dis da litteratura 2019
Or da Actualitad dals 01.11.2019.
laschar ir. Durada: 04:14 minutas.
cuntegn

Cultura Ils Dis da litteratura van A MAR

Per la 29avla giada sa scuntran, scripturs, lecturs, fans e freaks da la litteratura rumantscha a chaschun dals Dis da litteratura. Sco mintg’onn ha il festival litterar lieu l’emprima fin d’emna dal november a Domat.

Cun quai che l’emprim da november è Numnasontga ed uschia in firà a Domat, ha l’avertura lieu venderdi saira a Cuira en la chasa culturala «Kabinett der Visionäre». En il center da la sairada stat il concert da l’ensemble Gufo Reale e la chantadura puschlavina Manuela Tuena cun chanzuns da «MareMonti». La sonda e dumengia sa scuntra la scena da la litteratura rumantscha alura sco usità a Domat en la halla polivalenta Tircal.

Fotografia scriver a la riva da la mar
Legenda: Mintgatant sa chatta l'inspiraziun da scriver a la riva da la mar. MAD

Ils Dis da litteratura da quest onn s’occupan tematicamain cun la mar. Dentant betg en il senn da pussar en la giaschera cun in mojito enta maun, mabain per explorar e sfunsar en las cumparsas litteraras da quest lieu.

Differentas prelecziuns e perfomances s’occupan cun la simbolica da la mar sco lieu ester. In lieu che sa star per il mistic e nunenconuschent, per la profunditad ed il lontan, la brama ed aventura, ma era per la turbulenza ed il privel.

Cudeschs, texts e musica

Durant ils dus dis a Domat dettia differentas preschentaziuns da cudeschs, uschia preschenta era Flurina Badel ses emprim tom da poesias «tinitus tropic». En quel banduna la scriptura engiadinaisa vias e sendas da la poesia tradiziunala.

Fotografia da Flurina Badel
Legenda: Flurina Badel RTR, JÉRÉMIE SARBACH

Tranter auter stat era la vernissascha dal segund cudesch da Tina Planta-Vital «il blau tocca la terra» sin il program. En sias poesias raquinta ella da l'uniun cun tschiel e terra, cun aua ed aria e da la vita tranteren.

La sonda saira va a fin cun ina collascha da chanzuns e texts maritims. La schelta dals texts è vegnida fatga da Renzo Caduff, prelegids vegnan els da Benedetto Vigne e la part musicala vegn realisada da Corin Curschellas e la furmaziun «Las Rodas», Tumasch è & Andi Schnoz.

La dumengia cumpiglia differents puncts da program per ils pli giuvens. Uschia vegn preschentada l’istorgia da fantasy «Semperverd» scritta da Simona Demarmels.

A fin van ils Dis da litteratura a moda teatrala cun l'inscenaziun «Sar Wiederstand e sia maschina da fortuna» inscenà d’Annina Sedláček e Nikolas Stocker.

Foti d'Annina Sedláček
Legenda: Annina Sedláček. RTR

Exposiziun d’art en il foyer

Enramads vegnan ils Dis da litteratura da l’exposiziun da maletgs da Luis Coray. L’artist da Laax s’occupa en quels cun temas sco dachasa, emigraziun ed immigraziun. En ses maletgs cumbinescha el bartgas e bastiments cun lieus e lais da sia patria.

Foti da Luis Coray
Legenda: Luis Coray. RTR

RR actualitad 17:30