Il bab da Chasper Pult ha adina empruvà da svegliar l'interess da ses uffants per nums. Saja quai nums geografics u nums d'animals ed uschia vinavant. Chasper Pult e ses frar hajan sco uffants adina empruvà da scuvrir las muntadas davos nums.
Ils temas per l'emissiun sajan fitg savens vegnids dals auditurs. El haja savens survegnì propostas da dal tut la glieud. Savens haja el gì ina glista da spetga, uschè blers temas eran dumandads. Da temp en temp haja el er pudì duvrar temas actuals.
La vusch da Chasper Pult è enconuschenta a fitg blers e bleras. El raquinta d'in inscunter ch'el haja gì cun insatgi che haja cumenzà a discurrer cun el cura ch'el è ì en in'ustaria sin tualetta. Quest um haja vulì savair tge ch'il num da ses prà muntia.
Mintgatant hai er dà nums ch'èn stads ina pulita sfida da chattar ina muntada. Ma, quai saja adina stà ina sfida e betg in sforz. L'impurtant saja da betg dar si, lura chattian ins er ina schliaziun. E na, sia schlatta, n'haja da far nagut cun in pult.