Dacurt è vegnì publitgà en la retscha Romanica Raetica l’ovra «Elemaints d’üna grammatica cumparatistica dal rumantsch». En questa publicaziun dat l’autur Jachen Curdin Arquint in’invista en la structura dals idioms e dal rumantsch grischun e prova da congualar las structuras tranter pèr, cun las linguas neolatinas e cun il tudestg en Grischun.
Ina grammatica n’è betg in cudesch da recepts u da leschas che prescriva, co ch’ins ha da discurrer. Grammaticas pon resguardar il svilup istoric, descriver la situaziun actuala u porscher reglas che furman lu ina norma.
Din ins «la lavur» u «il lavur»? Cura èsi da dir «co» e cura «sco» ? Datti vairamain ina regla per quests problems che pon chaschunar inqual giadas rumpatesta. La nova publicaziun dat sin passa 300 paginas respostas a questas ed autras dumondas.
Arquint, Jachen Curdin: Elemaints d’üna grammatica cumparatistica dal rumantsch – idioms e rumantsch grischun, Romanica Raetica 23, Cuira 2020